Matur | mbl | 12.2.2019 | 13:58 | Uppfært 14:14

Pönnusteiktur silungur í hnetuhjúp með smælkikartöflum

mbl.is/Einn, tveir og elda

Þessi uppskrift er í senn afskapleg holl og svo einstaklega bragðgóð. Silungur stendur auðvitað alltaf fyrir sínu en kominn í þennan hnetuhjúp verður hann eitthvað allt annað og enn þá betra. Eiginlega bara hreinræktaður sparimatur ef út í það er farið.

Smælkið og salatið er síðan sérlega vel valið meðlæti en uppskriftin kemur frá Einn, tveir og elda.

Pönnusteiktur silungur í hnetuhjúp með smælkikartöflum og ávaxtasalati

Fyrir tvo

400 g silungur
50 g panko-brauðrasp
50 g hakkaðar heslihnetur
300 g smælkikartöflur
50 g salat
1 grænt epli
olía, salt & pipar

Aðferð:

Setjið smælkikartöflurnar í eldfast mót ásamt „dass“ af olíu, salti og pipar. Hitið ofninn í 200°C og bakið kartöflurnar í 20-30 mínútur.
Skerið silunginn í tvær steikur. Blandið saman brauðraspinum og heslihnetunum í skál og veltið silungnum upp úr blöndunni.
Hitið 2-3 msk. af olíu eða smjöri á pönnu og steikið silungssteikurnar í 3-4 mínútur á hvorri hlið, byrjið á að snúa roðhliðinni niður.
Skerið eplið niður í bita og blandið saman við salatið. Njótið vel!