Matur | mbl | 3.3.2019 | 17:43

Grillaður maís að hætti RVK Meat

Grillaður maís. Ásdís Ásgeirsdóttir

Maís er gróflega vanmetið meðlæti og ekki síst með góðri steik. Hér er útgáfa sem er algjörlega upp á tíu þar sem búið er að leika sér með maísinn þannig að útkoman ætti að koma öllum skemmtilega á óvart.

Grillaður maís

Fyrir 1-2

1 ferskur maís
1 msk. sýrður rjómi
2 tsk. Sriracha-sósa
2-3 msk. brauðraspur

Afhýðið maísinn og hreinsið. Sjóðið hann svo í 15 mín. eða eldið í ofni á gufu á 100°C í 10 mín. Grillið hann í smá tíma til að fá góða brúningu á hann, skerið svo í helminga og setjið á disk. Setjið sýrðan rjóma og Sriracha-sósu frjálslega yfir maísinn og endið með að setja heimagerðan brauðrasp yfir.

Heimagerður brauðraspur (geymið afganginn fyrir bleikjuna)

4 stk. brauðsneiðar
125 g smjör

Skerið brauðið í litla teninga eða vinnið það í matvinnsluvél til að fá það smátt skorið. Setjið í pott með smjöri og eldið þangað til brauðið verður gullinbrúnt. Hellið smjöri af og leyfið því að þorna á pappír.