Matur | Morgunblaðið | 22.6.2019 | 17:01

Grillaður Dala Höfðingi með jarðarberja- og pekanhnetu salsa

mbl.is/

Íslenskir mygluostar eru sívinsælir á veisluborðum landsmanna en það vita það kannski ekki allir að þeir passa líka fullkomlega á grillið! Hvort sem þú setur þinn uppáhaldsost á hamborgarann, grilluðu ostapizzuna nú eða nýtur þess að grilla hann einan sér, má með sanni segja að úr verði algjört sælgæti sem verður erfitt að standast. Það besta við grillaðan mat – fyrir utan dásamlegt bragðið – er líka hversu einföld eldunaraðferðin er og því er upplagt að leyfa hugmyndafluginu að njóta sín og prófa sig áfram með forrétti, aðalrétti og eftirrétti.

Grillaður Dala Höfðingi með jarðarberja- og pekanhnetu salsa

Smáréttur fyrir 4-6

2 stk. Dala Höfðingi
1 lítill bakki jarðarber
1 dl ristaðar og saxaðar pekanhnetur
1 góð handfylli ferskt basil
1 msk. balsamikedik
1 msk. hunang
Svartur nýmalaður pipar

Aðferð:

Skerið jarðarberin smátt ásamt basil og setjið í skál.
Bætið rest af hráefnum út í og hrærið aðeins saman. Smakkið til með svörtum pipar og e.t.v. hunangi ef þarf. Setjið til hliðar.
Hitið grill við meðalhita.
Leggið ostinn beint á grillið eða á bút af álpappír.
Lokið grillinu og grillið ostinn í u.þ.b 5 mínútur á hvorri hlið eða þar til hann er mjúkur í gegn.
Færið ostinn varlega yfir á lítið fat, toppið með jarðarberja salsa og berið fram strax með ristuðu baguette eða kexi.