Matur | mbl | 29.6.2019 | 19:12

Geggjaðar kryddaðar brauðbollur

Nýbakaðar bollur eru það allra besta á morgunverðarborðið. mbl.is/Columbus Leth

Við getum alltaf á okkur bollum bætt. Þessar ylvolgu bollur eru alveg ómissandi á morgunverðarborðið, og það besta er að þú hnoðar deigið deginum áður en þú bakar. Uppskriftin inniheldur sirka 15 bollur sem bakaðar eru í hring með fersku oreganó kryddi.

Brauðbolluhringur með oreganó

15 g ger
3,5 dl vatn
2 msk. ólífuolía
1 tsk. sykur
1,5 tsk. salt
50 g heilhveiti
450 g hveiti
Handfylli ferskt oreganó

Aðferð:

Sáldrið gerinu í vatnið og hrærið saman þar til gerið leysist upp. Bætið við olíu, sykri, salti og heilhveitinu. Bætið við hveitinu smátt og smátt.
Hnoðið vel í matvinnsluvél í 5 mínútur, þar til deigið leysir sig frá hliðunum. Setjið plastfilmu yfir skálina og látið deigið hefast yfir nótt inn í ísskáp.
Stráið hveiti á borðið og hnoðið örlítið upp úr deiginu og formið í sirka 15 bollur.
Setjið bollurnar í smelluform, 25 cm, klætt með bökunarpappír. Leggið rakt viskastykki yfir bollurnar og látið hefast í forminu í 1 tíma.
Hitið ofninn á 200°C. Penslið bollurnar með olíu og stráið oreganó yfir.
Bakið bollurnar í ofni í um 20 mínútur eða þar til gylltar og bakaðar í gegn.
Látið bollurnar kólna á rist og berið fram volgar með smjöri eða góðri ólífuolíu.