Matur | Morgunblaðið | 5.7.2019 | 11:01

Ferðalagasnakkið sem fitness-stjörnurnar elska

Þetta par elskar harðfisk og fær nóg af prótíni í kroppinn.

Nú þegar þjóðin þeysist um landið í útilegum og sumarbústaðaferðum eru matarmál ofarlega á baugi. Mikilvægt er að vanda fæðuval, þá ekki síst ef útivist og hreyfing er á dagskránni og forðast það í lengstu lög að fóðra fjölskylduna eingöngu á óhollustu. Hér koma undirstöðufæðutegundirnar sterkar inn eins og harðfiskur en það vill gleymast hversu mikil úrvalsfæða hann er.

Harðfiskur inniheldur að meðaltali 84% prótínhlutfall sem þýðir að 100 grömm innihalda 84 grömm af prótíni sem er fáheyrt meðal fæðutegunda. Að auki er hann glútenlaus, laktósafrír, hráfæði, kolvetnalaus og ketó.

Það segir sig því sjálft að harðfiskur er sérlega góður allan ársins hring og ekki síst á ferðalögum en þeim sem vilja ekki fá mylsnuna yfir allan bílinn er ráðlagt að kaupa harðfisk í bitum því þá kemur engin mylsna.