Hver man ekki eftir fréttinni sem birtist fyrr í vikunni um nýju vöruna frá KFC? Um var að ræða steiktan kjúkling í kleinuhringjaklemmu og spurt hvort útkoman yrði sturluð eða stórkostleg.
Það er mér mikið gleðiefni að greina frá því að niðurstaða er komin í málið og það er enginn annar en Árni Torfason sem tók það að sér að gera réttinn frá grunni og útkoman er með því betra sem sést hefur á netinu.
Árni, sem er búsettur í Svíþjóð, segist hafa séð status hjá Pétri Jónssyni á twitter eftir að hafa lesið fréttina á mbl.is. „Ég ákvað að slá til og prufa þetta. Vissi að ég átti mjög góða uppskrift að djúpsteiktum kjúklingi sem og frábæra uppskrift að kleinuhringjum. Þannig að það steinlá að skella sér í þetta. Hef gaman af því að dunda mér í eldhúsinu og einstaklega skemmtilegt að prufa eitthvað svona furðulegt eins og þennan borgara,“ segir Árni.
Fyrir þá sem vilja leika þetta eftir má nálgast uppskriftirnar sem Árni notaði hér að neðan. Hann segist reyndar vera með eitt leynilegt hráefni sem hann megi ekki gefa upp þar sem hann sé bundinn þangarskyldu gagnvart háttsettu fólki innan KFC.