Matur | mbl | 22.9.2019 | 17:26 | Uppfært 18:36

Marengsbomba í mörgum lögum

mbl.is/Berglind Hreiðarsdóttir

Þessi kaka er svo falleg að flestir sem líta hana augum fá ígildi aðsvifs eða vænan skammt af hamingju beint í æð. Það er engin önnur en Berglind Hreiðarsdóttir á Gotteri.is sem á heiðurinn af henni en hún segir lítið mál að útbúa kökuna þótt það taki auðvitað smá tíma að gera kökur í svona mörgum lögum.

„Ég mæli með að baka botnana með smá fyrirvara og dúllast svo bara í restinni þegar nær dregur í undirbúningi. Mér fannst kakan betri eftir að hafa fengið að vera í kæli í að minnsta kosti sólarhring.“

Marengsbomba í mörgum lögum

Marengs

6 eggjahvítur
1 tsk. hvítvínsedik
270 g sykur
1 msk. kartöflumjöl
2 tsk. vanilludropar
2 msk. bökunarkakó
80 g saxað suðusúkkulaði

Aðferð:

Þeytið eggjavítur og edik þar til það byrjar að freyða (geymið rauðurnar þar til þið gerið súkkulaðimúsina).
Blandið saman sykri og kartöflumjöli og bætið saman við eggjahvíturnar í litlum skömmtum.
Þeytið þar til stífir toppar hafa myndast og bætið þá vanilludropunum saman við og þeytið aðeins aftur.
Sigtið að lokum bökunarkakóið yfir blönduna og hellið saxaða súkkulaðinu út í og vefjið saman með sleif.
Teiknið 2 x 2 hringi (um 15 cm í þvermál) hvorn á sína bökunarplötuna íklædda bökunarpappír.
Bakið við 170°C í 55 mínútur og leyfið að kólna í ofninum (best að gera þetta daginn áður og leyfa að liggja í ofninum yfir nótt).

Súkkulaðimús og rjómi á milli laga

270 g suðusúkkulaði
6 eggjarauður
5 msk. sykur
400 ml rjómi (skipt í 200 og 200 fyrir músina)
600 ml af rjómi (til að nota sér fyrir utan músina)
hindber og saxað súkkulaði til skrauts

Aðferð:

Bræðið suðusúkkulaðið og leggið til hliðar.
Setjið eggjarauður, 200 ml af rjóma og sykur í skaftpott og þeytið saman.
Hitið eggjablönduna við meðalhita þar til hún þykknar, takið þá af hellunni.
Hrærið brædda suðusúkkulaðið saman við, hellið blöndunni í skál, plastið og setjið í kæli í að minnsta kosti klukkustund.
Þeytið þá 200 ml af rjóma og vefjið í nokkrum skömmtum saman við súkkulaðiblönduna, plastið þá að nýju og kælið aftur í klukkustund.
Hér má þeyta 600 ml af rjóma, hræra aðeins upp í súkkulaðimúsinni og taka til skrautið.

Samsetning

Setjið smá súkkulaðimús á botninn á kökudiskinum til þess að festa marengsinn.
Leggið þá fyrsta marengsbotninn á diskinn og dreifið óreglulega úr ¼ af músinni og þeytta rjómanum.
Endurtakið þar til fjögur lög hafa myndast.
Skreytið þá með ferskum hindberjum og söxuðu súkkulaði.
Best er að geyma kökuna í kæli í nokkrar klukkustundir eða yfir nótt áður en hún er borin fram því þá mýkist marengsinn upp.