Matur | mbl | 23.9.2019 | 14:24 | Uppfært 17:24

Kjúklingasalatið sem læknar mánudagsþunglyndið

mbl.is/Berglind Guðmundsdóttir

Sum salöt eru svo góð að þau gera allt betra. Eins og mánudaga sem reynast mörgum þungir. Búðu þér til þetta salat og hreiðraðu um þig uppi í sófa í kvöld og láttu mánudaginn renna úr þér. Við lofum að það verður allt betra.

Það er engin önnur en Berglind Guðmundsdóttir á GRGS.is sem á þetta salat og það er eins og sagt er: Merkið tryggir gæðin!

Kjúklingasalat lífsins með hvítlauks- og engiferdressingu

Fyrir fjóra

4 kjúklingabringur
salt og pipar
1 dl hunang eða agavesíróp
3 msk. sesamfræ
2 pokar klettasalat
1 askja kirsuberjatómatar, skornir í tvennt
1 mangó, skorið í bita
2-3 avokadó, skorin í litla bita
3 kíví, skorin í litla bita
nachos-flögur, muldar

Hvítlauks- og engiferdressing

1 dl extra virgin ólífuolía
1-2 hvítlauksrif, pressuð
1-2 msk. ferskur engifer, rifinn
½ kjúklingateningur
2 msk. fersk steinselja, söxuð
salt og pipar

Leiðbeiningar

Skerið kjúklingabringurnar í munnbita.
Hitið olíu á pönnu og fullsteikið kjúklinginn. Bætið hunangi/sírópi og sesamfræjum saman við og látið malla í smá stund eða þar til kjúklingurinn hefur fengið á sig gylltan lit.
Setjið klettasalat í skál og látið tómata, mangó, avokadó og kíví saman við.
Útbúið því næst dressinguna. Látið ólífuolíu í skál og setjið pressaðan hvítlauk, fínrífið engifer og saxaða steinselju saman við. Smakkið til með salti og pipar og meiri hvítlauk eða engifer eftir smekk. Setjið yfir salatið og endið á að mylja nachos-flögur yfir allt.