Djúsí kjúklingaborgari með brie og rauðkálshrásalati

Hér ber að líta á alveg stórkostlega bragðgóðan kjúklingaborgara með ...
Hér ber að líta á alveg stórkostlega bragðgóðan kjúklingaborgara með hrásalati. mbl.is/Hildur Rut Ingimarsdóttir

Kjúklingaborgari af allra bestu gerð er mættur á borðið! Við lofum að þið hafið ekki smakkað þá betri en þennan, en hann kemur úr eldhúsinu hennar Hildar Rutar sem segir; „þið verðið svo sannarlega ekki svikin af þessum kjúklingaborgara. Þessi er svo ljúffengur og djúsí. Panko raspið og brie osturinn passa einstaklega vel saman. Rauðkálshrásalatið setur svo punktinn yfir i-ið. En það er oft gert á mínu heimili, hvort sem það er með borgara eða taco.“

Djúsí kjúklingaborgari með brie og rauðkálshrásalati (fyrir 2)

  • 1-2 kjúklingabringur
  • Panko brauðraspur (fæst t.d. Í Hagkaup)
  • 1 egg
  • Salt og pipar
  • Krydd eftir smekk
  • Smjör
  • 2 brioche hamborgarabrauð
  • Brie ostur
  • Tómatur
  • Avocado

Rauðkálshrásalat:

  1. 5 dl ferskt rauðkál
  2. 3 msk. Hellmanns majónes
  3. 1½ msk jalapeno úr krukku


Aðferð:

  1. Pískið egg í skál. Hrærið saman brauðraspi og kryddi á disk eða skál.
  2. Skerið kjúklingabringurnar í tvennt langsum þannig að úr verða tvær þunnar sneiðar.
  3. Veltið þeim upp úr egginu og síðan raspinum.
  4. Skerið smjör í litla teninga og dreifið í botninn á eldföstu móti. Leggið kjúklinginn ofan á smjörið og dreifið svo fleiri smjörteninga ofan á hann.
  5. Bakið í u.þ.b. 30 mínútur við 190°C eða þar til kjúklingurinn er næstum fulleldaður.
  6. Skerið brie í sneiðar og dreifið þeim ofan á bringurnar. Setjið bringurnar aftur inn í ofn og bakið í 5-8 mínútur, þar til osturinn er bráðnaður.
  7. Hitið hamborgarabrauðin í ofni og dreifið hrásalatinu á botninn. Setjið kjúkling, tómata, avocado og lokið borgaranum
  8. Rauðkálshrásalat: Blandið saman majónesi, jalapeno og salti með töfrasprota eða matvinnsluvél. Skerið rauðkálið í ræmur og blandið saman við jalapenomajónesið með skeið.
mbl.is/Hildur Rut Ingimarsdóttir
mbl.is