Fiskurinn sem fjölskyldan elskar

Ljósmynd/Berglind Hreiðarsdóttir

Á degi sem þessum er fátt fullkomnara en fiskur og franskar! Djúpsteiktur fiskur í orly-deigi sem er svo fáránlega bragðgóður að fjölskyldan hreinlega tryllist við matarborðið — eða því sem næst.

Hér erum við með uppskrift frá Berglindi Hreiðars á Gotteri.is en hún segist fátt vita betra en góðan fisk og fraskar.

„Lykilatriðið er að fiskurinn sé ferskur og góður að mínu mati. Það er ekkert meira svekkjandi en að panta þennan dýrindisrétt og fá fúla og þurra fiskbita. Ef þið gerið þetta hins vegar sjálf getið þið verið viss með fyrsta flokks hráefni og þá getur útkoman ekki klikkað! Það er alls ekki flókið að gera orly-deig og þetta deig var alveg fullkomið, bæði fyrir fisk og lauk. Svo eru heimagerðir laukhringir eru brjálæðislega góðir! Ef þið eruð á annað borð að djúpsteikja og gera orly-deig, þá er eina vitið að gera þetta í leiðinni."

Fiskur & franskar

Fiskur og laukur í orly

  • 900 g þorskhnakki
  • 2 stórir laukar
  • 300 g hveiti
  • 1 ½ tsk. lyftiduft
  • 1 tsk. salt
  • 1 flaska óáfengur Krombacher-hveitibjór (fæst t.d. í Krónunni)
  • 2 egg
  • 3 msk. ólífuolía
  • Salt, pipar, hvítlauksduft eftir smekk
  • Um 1 ½ l af djúpsteikingarolíu/canola-olíu.

Aðferð:

  1. Blandið öllum hráefnum (nema fiski og lauk) saman í skál og pískið saman þar til deigið minnir á vöffludeig og leyfið því að standa í 20-30 mínútur á meðan þið útbúið tartar-sósu og skerið niður fiskinn og laukinn.
  2. Skerið þorskhnakkana niður í ákjósanlega bita, mér fannst skemmtilegra að hafa þá aðeins lengri og grennri. Kryddið þá með salti, pipar og hvítlauksdufti.
  3. Skerið laukinn niður í um ½ – 1 cm þykka hringi og notið þá stærstu.
  4. Hitið olíuna og reynið að halda henni í kringum 180°C. Ef þið eigið ekki hitamæli er gott að miða við að hita hana á hæsta hita þar til hún er vel heit og síðan bara hafa hana á miðlungshita á meðan þið steikið upp úr henni. Eldavélin mín býður upp á hitastillingar á skalanum 0-9 og ég var lengst af með hana stillta á 6 en fór upp í 8 inn á milli í eins og hálfa mínútu til að ná upp hitanum á milli bita.
  5. Veltið fisknum upp úr orly-deiginu og setjið eins og 3-4 bita í pottinn í einu og notið töng til að snúa fisknum reglulega (hver biti tekur um 8 mínútur en allt að 10 mínútur ef bitarnir eru þykkari/stærri).
  6. Leggið bitana á eldhúspappír þegar þeir koma upp úr pottinum til þess að þeir haldist stökkir og fínir.
  7. Notið síðan afgangs orly-deigið til að útbúa laukhringi. Veltið þeim upp úr deiginu og steikið á sama hátt og fiskinn, það er betra að hafa þá á aðeins lægri hita (5-6) og leyfa þeim að vera alveg 6-8 mínútur líka til þess að laukurinn mýkist vel upp. 

<strong>Tartar-sósa</strong>

<ul> <li>230 g majónes</li> <li>180 g súrar dillgúrkur (saxaðar)</li> <li>½ msk. ferskt dill (saxað)</li> <li>½ msk. fersk steinselja (söxuð)</li> <li>2 tsk. sítrónusafi</li> <li>1 tsk. sykur</li> <li>½ laukur (smátt saxaður)</li> <li>Pipar eftir smekk</li> </ul>

Aðferð:

<ol> <li>Öllu hrært saman í skál og kælt á meðan fiskur og laukur er djúpsteikt.</li> <li>Sósan borin fram með fisknum ásamt laukhringjum og til dæmis frönskum kartöflum.</li> <li>Einnig er gott að kreista sítrónusafa yfir fiskinn.</li> </ol>
Ljósmynd/Berglind Hreiðarsdóttir
Ljósmynd/Berglind Hreiðarsdóttir
Ljósmynd/Berglind Hreiðarsdóttir
mbl.is
Fleira áhugavert
Fleira áhugavert