Hélt stórkostlega veislu fyrir vini sína

Ljósmynd/Ragnar Freyr Ingvarsson

Enn á ný grætur þjóðin yfir því að vera ekki boðið í mat til Ragnars Freys Ingvarssonar — eða Læknisins í eldhúsinu eins og hann kallar sig milli mjalta og messu. Ef marka má matinn eru þetta uppákomur sem lengi verða í minnum hafðar og ef við mættum ráða myndi Ragnar alltaf draga út einn heppinn matgæðing sem aukagest í veislurnar sínar. Í þetta sinn bauð hann upp á marókóska veislu og hjálpi okkur allir heilagir!

Marókósk veisla — ofnbakaður kjúklingur með harissa og ólífumauki, spæsí eggaldinturn með granatepli, kúskús með feta og petispois, regnbogagulrætur með hunangi og fennel og flatbrauð steikt á flattoppnum

Fyrir kjúklinginn

  • 1,8 kg af kjúklingaleggjum og lærum.
  • 1 bolli heimagert ólífumauk (krukka af svörtum ólífum, hvítlaukur, salt og pipar og jómfrúarolía)
  • 4 msk. heimagerð harissa (siracha, jómfrúarolía, harissablanda frá Kryddhúsinu) handfylli af steinselju
  • 2 msk. sítrónupipar
  • 1 msk. salt
  • 2 msk. broddkúmen
  • 1 msk. túrmerik
  • 250 g kalamataólífur
  • 1/2 bolli jómfrúarolía
  • 4 msk. hunang

Fyrir eggaldinturninn

  • 4 eggaldin
  • 250 ml bragðbætt grísk jógúrt (bragðbætt með 3 hvítlauksrifjum, safa úr heilli sítrónu, hunangi)
  • spæsí tómatsósa (laukur, hvítlaukur, karríduft, 2 dósir tómatar og 1 krukka af tómata-chutney frá Friðheimum, salt og pipar)
  • 1/2 granatepli
  • mynta til skreytingar

Fyrir kúskúsið

  • 1 pakki kúskús
  • 1 fetakubbur
  • 1 rauð papríka
  • 1 græn papríka
  • 1 bolli petit pois
  • góð jómfrúarolía
  • salt og pipar
  • mynta til skreytingar

Fyrir gulræturnar

  • 400 g íslenskar regnbogagulrætur
  • 3 msk. jómfrúarolía
  • 2 msk. hunang
  • 1 msk. fennelfræ
  • salt og pipar

Aðferð:

  1. Fyrsta skrefið var að marinera kjúklinginn. Ég hafði gleymt að kaupa ólífumauk - svo ég bjó til mitt eigið. Tók krukku af svörtum ólífum, skolaði og setti í litla matvinnsluvél ásamt heilum sólóhvítlauk, salti, pipar og jómfrúarolíu og maukaði.
  2. Svo var að útbúa chilimaukið - harissa, sem ég átti ekki heldur. Þá var ekkert að gera annað en að henda saman sirachasósu, jómfrúarolíu og 1 msk. af marókkóskri chiliblöndu.
  3. Næsta skref var að mala broddkúmenið í mortéli.
  4. Að lokum var að sameina hráefnin - ólífumaukið, steinseljuna, chilimaukið, túrmerikið, sítrónupipar, salt og hunang.
  5. Notaði góða jómfrúarolíu.
  6. Sett í stóra skál og látið marinerast í fjórar klukkustundir.
  7. Næsta skref var að gera tómastósuna. Steikti laukinn, hvítlaukinn og karríið saman upp úr jómfrúarolíu og bætti svo tómötunum saman við. Næst var að bæta tómatmaukinu saman við og láta krauma í um klukkustund við lágan hita.
  8. Tók þessu næst eggaldin og skar niður í ámóta stóra bita, penslaði með jómfrúarolíu og bakaði í 200 gráðu heitum ofni í um 30 mínútur. Sneri einu sinni.
  9. Á meðan eggaldinið var í ofninum bjó ég til jógúrtsósuna. Blandaði saman grískri jógúrt, sítrónusafa, smátt söxuðum hvítlauk, hunangi, salti og pipar og lagði til hliðar.
  10. Svo var bara að raða þessu upp. Fyrst eitt lag af eggaldini, svo tómatsósa, svo jógúrt og endurtaka þar til hráefnið var uppurið.
  11. Sáldraði fullt af myntu yfir. Áður en ég bar réttinn á borð skóf ég innan úr hálfu granatepli og setti yfir.
  12. Gulræturnar voru ofureinfaldar. Flysjaði tvo poka af regnbogagulrótum og skar í fernt eftir lengdinni og lagði í eldfast mót. Velti upp úr jómfrúarolíu og hunangi, salti og pipar. Sáldraði svo fennelfræjum yfir og bakaði í 180 gráðu heitum ofni í þrjú kortér. Velti þeim nokkrum sinnum á eldunartímanum til að hindra að þær myndu brenna.
  13. Þær urðu líka alveg fullkomar. Skreytti með myntulaufum.
  14. Hrærði í brauðinn fyrr um daginn svo að þau fengu tíma til að hefast, þar verður bragðið af þeim til. Hægt er að sjá uppskriftina hérna. Eins og fram hefur komið sleppti ég kjúklingabaununum og steikti brauðin frekar en að grilla þau. Þau heppnuðust ljómandi vel!
  15. Kúskús er líklega einfaldasta meðlæti sem um getur. Setti kúskúsið í skál og hellti sjóðandi kjúklingasoði yfir og setti plastfilmu yfir skálina og beið í fimm mínútur. Voila - tilbúið. Svo setti ég það á skálar og skreytti með fetaosti, petis pois, rauðlauk, papríku, ferskri myntu og svo góðri jómfrúarolíu. Og salt og pipar að sjálfsögðu.
  16. Kjúklingurinn ilmaði dásamlega þegar ég sótti hann í ísskápinn. Lagði hann í eldfast mót, hellti 250 g af kalamataólífum yfir og bakaði í 180 gráðu heitum ofni í fimm kortér.
  17. Kjúklingurinn ilmaði enn þá betur þegar hann kom út úr ofninum. Skreytti með ferskri steinselju. Ferskt kóríander hefði einnig verið ljúffengt en sumir í minni fjölskyldu þola ekki kóríander - svo úr varð steinselja, sem er líka dásamlega ljúffeng.
  18. Maturinn var lagður á borð - og úr varð sannkallað hlaðborð.
Ljósmynd/Ragnar Freyr Ingvarsson
Ljósmynd/Ragnar Freyr Ingvarsson
Ljósmynd/Ragnar Freyr Ingvarsson
Ljósmynd/Ragnar Freyr Ingvarsson
Ljósmynd/Ragnar Freyr Ingvarsson
Ljósmynd/Ragnar Freyr Ingvarsson
Ljósmynd/Ragnar Freyr Ingvarsson
mbl.is