Pasta með beikoni, döðlum og vínberjum

Hér gefur að líta hinn fullkomna pastarétt á degi sem þessum. Einfaldur og einstaklega bragðgóður enda er hann úr smiðju hinnar einu sönnu Berglindar Guðmundsdóttur á GRGS.is en eins og alþjóð ætti að vita þá var að koma út bók frá henni með öllum vinsælustu og bestu uppskriftunum hennar.

Pasta með beikoni, döðlum og vínberjum

Fyrir 4
  • 400 g spagettí
  • 1½ kjúklingateningur
  • 2 dl vatn
  • 100 g rjómaostur
  • 2 dl matreiðslurjómi
  • pipar
  • 2 msk. steinselja
  • 2 tsk. óreganó
  • 150 g beikon, smátt skorið
  • 120 g sveppir, saxaðir
  • 4 hvítlauksrif, söxuð
  • 100 g valhnetur, skornar í tvennt
  • 300 g rauð vínber, skorin í tvennt
  • 180 g döðlur, steinlausar, saxaðar

Sjóðið pastað. Hitið 2 dl af vatni í potti og setjið kjúklingateninga út í. Bætið rjómaosti og rjóma saman við; hitið að suðu. Kryddið með pipar, steinselju og óreganó. Setjið til hliðar. Steikið beikon á þurri pönnu. Bætið því næst við smá olíu og látið sveppi og hvítlauk saman við.

Hellið rjómaostasósunni út á pönnuna ásamt valhnetunum. Látið malla í um 5 mínútur.

Bætið vínberjum og döðlum saman við sósuna. Hellið sósunni yfir pastað. Piprið ríflega, berið fram og njótið vel!

Nýja bókin hennar Berglindar.
Nýja bókin hennar Berglindar. Haraldur Jónasson/Hari
Berglind Guðmundsdóttir.
Berglind Guðmundsdóttir. Haraldur Jónasson/Hari
mbl.is