Matur | mbl | 1.12.2019 | 17:02 | Uppfært 2.12.2019 14:16

Geggjað takó með avókadó-salsa frá Berglindi

Berglind Guðmunds var að gefa út bók með öllum vinsælustu uppskriftunum sínum á Gulur, rauður, grænn og salt (grgs.is) sem hlýtur að teljast mikill hvalreki fyrir aðdáendur hennar.

Hér er að finna uppskrift að æðislegu takó sem fer vel í maga.

Risarækjutakó með avókadósalsa

Fyrir 4

2 pakkar risarækjur
2 msk. ólífuolía
2 hvítlauksrif
1 tsk. kummín
1 tsk. chiliduft
½ tsk. hvítlauksduft
½ tsk. sjávarsalt

Avókadósalsa

250 g kirsuberjatómatar
3 avókadó, skorin í bita
1 jalapeno, fræhreinsað og saxað
salt og pipar
safi úr hálfri límónu
ferskt kóríander, saxað

Kóríandersósa

1 dós sýrður rjómi
2 msk. smátt saxað kóríander
1 msk. límónusafi
12 litlar tortillur

Affrystið rækjurnar. Hrærið saman ólífuolíu, hvítlauk, kummín, chili- og hvítlauksduft og smakkið til með salti. Setjið rækjurnar saman við og marinerið eins lengi og tími leyfir, frá 10 mínútum í allt að sólarhring.

Hitið olíu á pönnu og steikið rækjurnar á háum hita þar til þær eru orðnar fallega bleikar að lit, eða í 4-5 mínútur. Takið af hitanum og kreistið límónusafa yfir þær. Gerið avókadósalsa með því að skera tómatana í teninga, blanda öllum hráefnum saman, kreista límónu yfir og salta og pipra. Blandið öllum hráefnum í kóríandersósu saman.

Hitið takóskeljarnar og setjið avókadósalsa, risarækjur og kóríandersósu í hverja skel. Stráið fersku kóríander yfir í lokin.