Þessar smákökur eru algjört æði enda er gott bit í þeim og frábært bragð. Við mælum sum sé 100% með þeim enda algjörlega upp á tíu. Það er meistari Berglind Hreiðars sem á heiðurinn af þessari uppskrift.
Heslihnetusmákökur með súkkulaðidýfu
· 170 g smjör við stofuhita
· 130 g púðursykur
· 1 egg
· 1 tsk. vanilludropar
· 250 g hveiti
· ½ tsk. kanill
· ¼ tsk. salt
· 100 g Til hamingju hakkaðar heslihnetur + meira til skrauts
· 250 g suðusúkkulaði til skrauts
Aðferð:
1. Þeytið saman púðursykur og smjör þar til létt og ljóst.
2. Bætið egginu saman við ásamt vanilludropunum og skafið niður á milli þess sem þið hrærið vel.
3. Blandið hveiti, kanil og salti saman í skál og setjið út í smjörblönduna í nokkrum skömmtum.
4. Að lokum fara hakkaðar heslihneturnar saman við og deiginu er þá hellt á hveitistráðan flöt.
5. Gott er að vera líka með smá hveiti á höndunum og skipta deiginu í tvo jafna hluta.
6. Hvorum hluta er rúllað upp í þétta pylsu sem er um 5 cm í þvermál, rúllan er plöstuð og sett í kæli yfir nótt.
7. Daginn eftir er hvor rúlla um sig skorin í um 12 sneiðar og sneiðarnar bakaðar við 180°C í 15-17 mínútur eða þar til þær gyllast vel í köntunum.
8. Kökurnar eru kældar á grind og því næst er suðusúkkulaði brætt og kökunum dýft til hálfs í súkkulaðið.
9. Hökkuðum heslihnetum er þá stráð yfir súkkulaðihlutann og súkkulaðinu leyft að storkna að nýju áður en bera má kökurnar fram.