Þessi ofnbakaði kjúklingaréttur er algjör snilld enda fremur auðveldur í framkvæmd sem er akkúrat það sem við viljum sem oftast — að minnsta kosti hversdags! Það frábæra við hann er að börn eru sérlega sólgin í hann og því kemst hann fljótt á uppáhaldslista heimilisins ef að líkum lætur.
Ofnbakaður kjúklingur í rjómasveppasósu
Fyrir ca. fjóra
- 600-800 g kjúklingalundir eða kjúklingabringur frá Ali (gott að skera þær í aðeins minni bita)
- 250 ml rjómi (lítil ferna)
- 1 askja sveppir
- 1 laukur
- 1 pakki fløtesaus (rjómasósa) frá TORO
- 1 pakki sveppasósa frá TORO
- Bezt á kjúklinginn eða annað gott kjúklingakrydd
Aðferð:
- Kryddið kjúklinginn með Bezt á kjúklinginn (eða öðru góðu kjúklingakryddi) og léttsteikið á pönnu.
- Raðið kjúklingabitunum í eldfast mót.
- Skerið sveppina í sneiðar, saxið laukinn, steikið upp úr smjöri og hellið yfir kjúklingabitana.
- Hellið 500 ml af vatni og 250 ml af rjóma í pott og hrærið fløtesaus og sveppasósunni (innihaldi pakkanna) út í.
- Fáið suðuna rólega upp og hrærið reglulega á meðan. Hellið sósunni yfir kjúklinginn og bakið í ofni í um 20 mín á 180°C.
- Berið fram með hrísgrjónum og fersku salati.