Pítur eru mögulega besti og einfaldasti matur í heimi. Undirrituð er hið minnsta búin að ganga í gegnum mjög langt tímabil þar sem ég borða pítur 2-3 sinnum í viku. Þá hvort heldur sem er í hádeginu eða á kvöldin. Tæknin hefur verið fullkomnuð þannig að hráefninu sem á að fara í pítuna er fyrst blandað saman í skál og svo er mokað ofan í brauðið sem búið er að hita í brauðrist. Leynihráefnið er snakk. Helst rifflaðar flögur með sýrðum rjóma og lauk. Ég veit að þetta hljómar kannski galið en þetta er dásamlegt! Mitt eina markmið í lífinu í dag er að búa til mína eigin pítusósu sem er nánast hitaeiningasnauð en það bíður betri tíma.

Hér gefur að líta aðra útgáfu af pítu og það er engin önnur en matgæðingurinn María Gomez á Paz.is sem á hana. Hún er með beikon og kjöt í sinni og hún lítur hrikalega vel út.