Magnaður mexíkóskur kjúklingaréttur sem slær alltaf í gegn

Ljósmynd/Gott í matinn

Ef það er eitthvað sem ætti að æra bragðlaukana þá er það þessi kjúklingaréttur sem á rætur að rekja til Mexíkó — eða því sem næst. Þetta er réttur sem allir í fjölskyldunni elska og er fremur auðvelt að búa til.

Mexíkóskur kjúklingaréttur

Fyrir fjóra
  • 4 kjúklingabringur
  • 2 msk. krydd (til dæmis chili explosion eða mexíkósk kryddblanda)
  • 1 blaðlaukur, smátt skorinn
  • 1 stór krukka salsasósa (um 350 g)
  • 150 g rjómaostur frá Gott í matinn (tæplega hálf dósin)
  • 1 mexíkóostur, smátt skorinn
  • 1⁄2 kjúklingateningur
  • Nokkrar tortillaflögur
  • 1 poki rifinn mozzarellaostur frá Gott í matinn
  • 2 tómatar, skornir í grófa bita
  • smátt saxað ferskt kóríander
  • 1 dós 18% sýrður rjómi frá Gott í matinn
  • 2 msk. smjör til steikingar

Aðferð:

  1. Hitið ofn í 180 gráður og kveikið undir pönnu á meðalháum hita.
  2. Skerið bringurnar í teninga, kryddið og steikið upp úr smjöri þar tilþær hafa brúnast.
  3. Leggið kjúklinginn í eldfast mót og stráið blaðlauknum yfir.
  4. Hellið salsasósunni á pönnuna ásamt smátt skornum mexíkóostinum og rjómaostinum og hálfum kjúklingateningi.
  5. Setjið 1 dl af vatni í salsakrukkuna, lokið á og hristið og hellið á pönnuna.
  6. Hitið sósuna þar til allt bráðnar en það er allt í lagi að hafa smá mexíkóostsbita í henni, bara betra.
  7. Hellið sósunni yfir kjúklingabringurnar.
  8. Stráið yfir rifna ostinum og nokkrum lúkum af muldum tortillaflögum ásamt gróft skornum tómötum.
  9. Bakið í 20 mínútur.
  10. Toppið með ferskum kóríander og sýrðum rjóma frá Gott í matinn og berið fram t.d. með soðnum hrísgrjónum og salati.

Höfundur: Helena Gunnarsdóttir

mbl.is