Ætla að hafa opið allan sólarhringinn

Jóhannes Ásbjörnsson, talsmaður Gleðipinna.
Jóhannes Ásbjörnsson, talsmaður Gleðipinna. Eggert Jóhannesson

Veitingamenn eru að bregðast við aðstæðum með ýmsum hætti og hafa Gleðipinnar ákveðið að hafa Aktu taktu í Skúlagötu opið allan sólarhringinn. 

Að sögn Jóhannesar Ásbjörnssonar, talsmanns Gleðipinna, er þetta gert til að gefa viðskiptavinum færi á að versla allan sólarhringinn, þá ekki síst vaktavinnufólki. 

„Við erum að upplifa afar sérstakar aðstæður í samfélaginu. Við sem og aðrir erum að leita allra leiða til að þjónusta okkar viðskiptavini sem best. Við höfum orðið varir við mikla aukningu í eftirspurn á Aktu taktu sem kemur ekki á óvart þar sem að þar er afgreitt er í gegnum lúgu,” segir Jóhannes en þessi breyting mun að öllum líkindum vara í einhverjar vikur eða eins og þarf að því kemur fram í fréttatilkynningu frá fyrirtækinu.

Sértækar aðgerðir til að þjónusta viðskiptavini Gleðipinna í breyttum aðstæðum

Veitingastaðir Gleðipinna verða áfram opnir næstu vikurnar en fyrirmælum sóttvarnalæknis verður fylgt og staðan metin daglega. Ýmsar sértækar aðgerðir hafa verið ræstar til þess að veitt sem besta þjónustu í þessum sérstöku aðstæðum. Þar má nefna: 

  • Frítt að borða fyrir börnin.
    Öll börn borða frítt á veitingastöðum Gleðipinna næstu fjórar vikurnar eða þar til samkomubanni er aflétt. Tilboðið gildir bæði í sal og í take away allan opnunartíma allra veitingastaðanna (einn barnaréttur fylgir hverjum seldum aðalrétti).
  • 15 lúgur á höfuðborgarsvæðinu. Aktu taktu staðirnir við Skúlagötu, í Stekkjarbakka, í Ásgarði og Fellsmúla, afgreiða allir í gegnum lúgu. Eins og áður sagði verður Aktu Taktu Skúlagötu opinn allan sólarhringinn um óákveðinn tíma. 
  • Heimsending: Eftirtaldir veitingastaðir Gleðipinna senda heim með Aha heimsendingarþjónustu: Blackbox, Eldsmiðjan, Fabrikkan, Pítan, Roadhouse, Shake&Pizza. Hafa ber í huga að mikið álag hefur skapast í heimsendingu hjá Aha og tekur biðtími mið af álagi hverju sinni.
mbl.is
Fleira áhugavert
Fleira áhugavert