Matur | Morgunblaðið | 7.5.2020 | 11:01

Kjúklingarétturinn sem smellpassar við öll tilefni

Ljósmynd/Linda Ben

Þessi kjúklingaréttur er vel kryddaður og bragðmikill og smellpassar með svalandi raita-sósunni. Það er Linda Ben sem á heiðurinn af uppskriftinni, sem ætti að slá í gegn á flestum heimilum enda einföld og einstaklega bragðgóð.

Kjúklingabringur í jógúrtmarineringu með raita-sósu

200 ml grísk jógúrt frá Örnu mjólkurvörum
1 tsk. kummín
1 tsk. chili-krydd
1 tsk. paprika
2 hvítlauksgeirar
safi úr ½ sítrónu
salt og pipar
4 kjúklingabringur

Raita-sósa

300 ml grísk jógúrt frá Örnu mjólkurvörum
1 lítið avókadó
½ agúrka mjög smátt söxuð
1 dl ferskt kóríander smátt saxað
¼ tsk. kummínkrydd
safi úr ¼-½ sítrónu
salt og pipar eftir smekk

Gott að bera fram með hýðishrísgrjónum og fersku salati.

Aðferð:

Byrjið á því að útbúa marineringuna fyrir kjúklinginn. Setjið grískt jógúrt í skál ásamt kryddunum, pressið hvítlauksrifin með hvítlaukspressu út í skálina, kreistið safann úr ½ sítrónu út í og blandið öllu saman, smakkið til með salti og pipar.
Setjið kjúklingabringurnar út í jógúrtmarineringuna og látið marinerast í a.m.k. 3-4 klst.
Byrjið að sjóða hrísgrjónin áður en farið er að grilla.
Grillið bringurnar á heitu grilli þar til þær eru eldaðar í gegn, u.þ.b. 15-20 mínútur, snúið þeim reglulega á meðan þær eru á grillinu.
Sósan er útbúin með því að mauka avókadóið í skál, setja grískt jógúrt út í skálina og hræra saman.
Skerið agúrkuna mjög smátt niður og kóríanderið. Setjið út í skálina ásamt kummínkryddi og kreistið smá sítrónusafa út í, smakkið til með salti og pipar.
Berið fram með fersku salati.