Kjúklingarétturinn sem Ameríka elskar

Ljósmynd/Sirrý í Salt eldhúsi

Þessi uppskrift er algjört æði enda hafa allir þeir sem borðað hafa svona dásemd vart jafnað sig og þrá það eitt að endurtaka leikinn.

Það er Sirrí í Salt eldhúsi sem á þessa uppskrift en um hana segir hún þetta:

„Við fáum mikið af erlendum matgæðingum til okkar í Salt eldhús á námskeið sem eru sniðin að því að kynna fyrir þeim íslenska matargerð. Oft skapast fjörugar umræður þar sem eldamennska er þeirra áhugamál og oft ástríða og skiptst er á leynitrixum og uppskriftum. Eitt sinn fengum við par frá Ameríku og eiginmaðurinn trúði mér fyrir því að konan hans gerði besta steikta kjúkling í heimi. Auðsótt var að fá uppskrift og hér er hún.“

Kjúklingasnitsel á Ameríska vísu – American fried chicken

Fyrir 4

  • 3 -4 kjúklingabringur (150 g á mann)
  • 3-4 msk. majónes
  • 2 tsk. sinnep
  • 1-2 hvítlauksgeirar (eftir stærð), marðir
  • 4 msk. olía
  • ½ dl hveiti
  • 1-2 egg, pískuð saman á disk
  • 2 dl rasp

Aðferð:

Skerið kjúklingabringurnar þvert á bringuna með beittum hníf þannig að þið fáið tvær frekar þunnar steikur. Setjið þær á bretti með plasti undir og yfir og lemjið á þær með buffhamar eða trékefli þar til þær eru frekar þunnar. Hrærið majónes, sinnep og hvítlauk saman í skál og penslið kjötið með blöndunni. Geymið í 2 klst. eða yfir nótt í kæli.

Dustið hveiti á kjúklingabringurnar og veltið þeim síðan upp úr eggi og síðan raspi. Steikið gullinbrúnar á hvorri hlið. Berið fram með steiktum kartöflum og salati eða soðnu grænmeti og góðu aioli.

Ljósmynd/Sirrý í Salt eldhúsi
mbl.is