Við fengum Hönnu Ingibjörgu, ritstjóra á vinsælasta matartímariti landsins, Gestgjafanum, til að deila með okkur uppáhalds uppskriftinni sinni. En hún býður okkur í veislu á franska vísu.

Aðspurð segist Hanna Ingibjörg þykja margt svo gott og erfitt að velja á milli rétta – sem kemur alls ekki á óvart miðað við það starf sem hún sinnir. „Það er svolítið skemmtilegt að þú varpir þessari spurningu til mín akkúrat núna þar sem ég er einmitt að fjalla um hvað sé uppáhaldsmaturinn minn í ritstjórapistlinum mínum í 7. tölublaði Gestgjafans - sem kemur út í næstu viku og er með glænýju og spennandi þema.“

Fyrsta flokks hráefni 
Hanna Ingibjörg segir að uppáhalds réttirnir hennar breytist reglulega með nýjum ferðalögum, heimsóknum á veitingastaði og tilraunum í eldhúsinu. Hún þarf ekki annað en að kaupa nýja matreiðslubók og þá er hún komin með nýjan uppáhaldsrétt í smá tíma, en síðan tekur eitthvað nýtt við. 

„Það eru þó ansi margir réttir sem ég elda oft og eru mínir heimilisréttir eins og kálfakjöt í estragon-sósu, mexíkóskar pönnukökur, sjávarréttarsúpa og margir pottréttir. Ég er mikil pottréttakona en ég er líka mikið fyrir spennandi salöt og pastarétti – og ég gæti haldið lengi áfram. Í raun finnst mér flestur matur góður ef hann er úr fyrsta flokks hráefni, eldaður af þekkingu og færni.“

Frægasti grænmetisréttur Frakka
Það er þó ein uppskrift sem hefur fylgt Hönnu Ingibjörgu frá því hún var au pair í Frakklandi fyrir mörgum árum síðan, en hún hefur eldað réttinn margoft og þróað í gegnum tíðina. Uppskriftin er henni hjartfólgin og dálítið í takt við tíðaranda þessa árstíma.

„Sennilega er ratatouille frægasti grænmetisréttur Frakka, en hann er upprunninn frá Suður-Frakklandi, nánar tiltekið frá Nice. Rétturinn er dæmigerður franskur sveitagrænmetisréttur sem sennilega allir Frakkar hafa eldað og smakkað, en frægð réttarins í seinni tíð má helst rekja til hinnar margrómuðu teiknimyndar sem heitir í höfuðið á réttinum. Rat á frönsku þýðir rotta og gaman er að sjá hvernig framleiðendur leika sér að nafninu með því að láta rottu, rat, elda rat-atouille,“ segir Hanna Ingibjörg.

Gera uppskriftina að sínu
Hanna Ingibjörg segir okkur að hefðbundinn ratatouille-pottréttur innihaldi ávallt lauk, hvítlauk, tómata, eggaldin, kúrbít, papriku, ólífuolíu og kryddjurtir. Misjafnt er þó hvaða kryddjurtir eru notaðar, það fari eftir smekk hvers og eins eða jafnvel árstíma. Og oft eigi fjölskyldur sína eigin ratatouille-uppskrift, eða í það minnsta sína útgáfu eða eldunaraðferð. Sumir vilja mauksjóða réttinn á meðan aðrir vilja hafa grænmetið fremur stökkt undir tönn og algengt sé að hlutföllin af grænmetinu séu misjöfn. Hanna Ingibjörg bætir því við að ýmsar útgáfur séu að finna í gömlu nýlendulöndum Frakka, eins og Marokkó, Alsír og Túnis. Þar sé notað meira af kryddi líkt og kummini, kóríander og chili. Í alsírsku útgáfunni sé til dæmis meira notað af lauki og hvítlauki og þeir setja talsvert magn af þurrkaðri myntu út í réttinn. Eins bera þeir réttinn oft fram með eggjum, og setji þá eggin yfir og elda þau ofan á réttinum í lokin.

Bon appetit!
Ratatouille er einstaklega góður réttur á hefðbundinn máta að sögn Hönnu Ingibjargar, en hún mælir með að leika sér svolítið og bragðbæta með kryddum. 

„Eldunin er svolítið misjöfn en matarpúrítanar segja að það eigi að steikja hvert hráefni fyrir sig og síðan blanda öllu saman í lokin og elda þar til grænmetið er orðið mjúkt og maukað. Það gefur auga leið að þetta er svolítil vinna en engu að síður þess virði að prófa.

Uppskriftin hér er mín útgáfa af ratatouille en hún er frá fjölskyldu í Vestur-Frakklandi þar sem ég var au pair fyrir mörgum árum. Ég þarf vart að taka það fram að fólk velji fyrsta flokks hráefni í réttinn. Bon appetit!”

Ratatouille (fyrir 4)

• 1 stór laukur
• 4 hvítlauksgeirar
• 6-8 msk. ólífuolía
• 6 tómatar
• 2 kúrbítar
• 1 eggaldin
• 1 rauð paprikur
• 1 græn paprika
• 1 msk. herbes de Provence
• 2 greinar ferskt rósmarín
• svartur nýmalaður pipar
• gróft sjávarsalt

Aðferð:

1. Skerið allt hráefnið eins og á mynd. Hitið 4 msk af olíu í góðum potti, helst pottjárnspotti. Steikið laukinn í u.þ.b. 3-4 mínútur eða þar til hann verður glær að lit, bætið þá hvítlauknum saman við og steikið áfram en gætið að því að laukurinn brenni ekki. Restin af olíunni er notuð til að bæta í af og til enda drekkur hráefnið olíuna svolítið í sig. Setjið kúrbítinn saman við og látið malla í u.þ.b. 10 mínútur og hrærið í annað slagið. Bætið eggaldinbitunum út í pottinn og látið malla í nokkrar mínútur. Látið tómatana saman við blönduna ásamt kryddjurtunum, kryddið vel með pipar og salti. Setjið lokið á og látið blönduna malla við meðalhita í u.þ.b. 20-35 mínútur, hrærið í af og til.
2. Þegar u.þ.b. 10-15 mínútur eru eftir af eldunartímanum eru paprikurnar settar saman við. Misjafnt er hversu lengi rétturinn er eldaður, sumir vilja hafa grænmetið fremur stökkt en aðrir vilja hafa það maukaðra. Góð regla er að passa upp á að eggaldinið sé eldað í gegn því það er ekki gott hrátt, það þarf að ná að soga í sig bragðið í réttinum.
3. Mikilvægt er að smakka réttinn til í lokin og krydda með pipar og salti. Rétturinn er mjög góður daginn eftir líka.