Matur | mbl | 11.8.2020 | 14:48

Ostakakan sem sló öll met

Ljósmynd/María Gomez

Það er María Gomez á Paz.is sem á heiðurinn að þessari snilld en hún segir að sér finnist bakaðar ostakökur alltaf svo góðar – og við tökum heilshugar undir það.

„Áferðin á þannig ostakökum er alltaf öðruvísi en á þeim sem eru ekki bakaðar. Hún er meira svona þurr og þétt í sér og ekki eins sæt þegar hún er bökuð, en mér finnst báðar gerðirnar afar góðar enda mikil ostakökukona,“ segir María.

Deigið í botninn og ostakökuna er gert í sitthvoru lagi og hellt ofan á hvort annað og bakað í jafnlanga stund í sama formi Bæði deigin eru afar einföld að gera og einnig súkkulaðibráðina sem kemur ofan á.

Bökuð brownie turtle ostakaka

Brownie botn

115 g smjör
115 g suðusúkkulaði
150 g sykur
50 g púðursykur
2 egg
1 tsk vanilludropar
1/2 tsk. salt
45 g hveiti
10 g bökunarkakó (ég notaðist við Cadbury)

Ostakakan

450 g Philadelphia Original rjómaostur
2 egg
115 g sykur
1 tsk. vanilludropar

Súkkulaðibráð og ofan á

60 g suðusúkkulaði
60 g rjómi
Lófafylli af pekanhnetum
50 g smátt skorið suðusúkkulaði eða súkkulaðidropar

Aðferð Brownie botn

Byrjið á að hita ofn á 180°C blástur
Bræðið súkkulaði og smjör saman í potti við miðlungsháan hita og hrærið stöðugt í á meðan svo brenni ekki
Setjið svo í hrærivélarskál og kælið í 10 mín
Þegar hefur kólnað í þessar 10 mín hrærið þá sykrinum öllum út í súkkulaðið með písk
Bætið nú 1 eggi út í í einu og hrærið með písk áfram bara létt saman
Sigtið næst hveiti og kakó út í blönduna og setið salt og vanilludropa saman við
Hrærið eins lítið saman og hægt er í handþeytara eða með písk svo kakan verði ekki seig en bara rétt þannig að hráefnin blandist saman
Smyrjið kringótt bökunarmót sem er 23-24 cm í þvermál og hellið deiginu ofan í

Ostakakan

Setjið ostinn í skál og hrærið hann upp með handþeytara
Bætið svo sykri, eggjum og vanilludropum saman við og þeytið þar til allt er blandað saman og orðið frauðkennt og ljóst
Hellið svo blöndunni yfir brownie blönduna og setjið í ofninn í 30 mínútur við 180°C, lækkið svo niður í 165°C og hafið í 15 mínútur í viðbót
Gott er að gera súkkulaðibráðina á meðan 15 mínútur eru eftir

Súkkulaðibráð

Brjótið 60 g suðusúkkulaði ofan í skál
Hitið svo rjómann upp að suðu
Hellið honum svo beint út á súkkulaðið í skálinni og látið standa stutta stund
Hrærið svo vel saman með gaffli eða písk þar til það er orðið þykkt og silkimjúkt og leggjið til hliðar
Skerið í pínulitla ferninga 50 g af suðusúkkulaði og brjótið pekanhneturnar smátt milli fingranna
Hellið svo súllulaðibráðinni yfir kökuna þegar hún hefur aðeins kólnað og dreifið hnetunum og smátt skorna súkkulaðinu yfir og kælið

Punktar

Kakan er best köld og því finnst mér gott að vera búin að kæla hana í nokkrar klukkustundir áður en hún er borin fram eða jafnvel gera hana kvöldinu áður, en hún er sko ekki síðri daginn eftir.