Matur | mbl | 15.9.2020 | 14:01 | Uppfært 14:36

Haustsúpan sem Hildur Rut elskar

Stórkostleg tómatsúpa í haustlægðinni. mbl.is/Hildur Rut Ingimarsdóttir

Það hefur ekki farið framhjá neinum að haustið hefur bankað á dyrnar og þá jafnast fátt á við bragðgóða tómatsúpu með ferskum mozzarella og basilíku. Og þessi er einstaklega góð!

Súpan er í boði Hildar Rutar sem segist alltaf sjúk í súpur á haustin. „Þessi tómatsúpa inniheldur gulrætur sem gerir súpuna einstaklega góða. Toppurinn yfir i-ið er að rífa ferskan mozzarella og dreifa yfir súpuna rétt áður en þið borðið hana. Svakalega gott. Ég kaupi minn mozzarella í Costco, hann er mjúkur og mjög bragðgóður þar. Mæli með að bera þetta fram með góðu brauði.“

Yndisaukandi tómatsúpa (fyrir 3-4)

1/2 laukur
4-5 gulrætur, skornar í bita
400 g plómutómatar í dós
2 msk tómatpúrra
2 hvítlauksrif
2 tsk grænmetiskrafturkraftur
4 dl vatn
1-2 dl vatn (meira vatn)
1 ½ dl rjómi
salt og pipar
cayennepipar

Toppa með:

Ólífuolíu
ferskri basilíku
ferskum mozzarella

Aðferð:

Steikið lauk upp úr ólífuolíu. Bætið svo gulrótum og hvítlauk saman við.
Hellið tómötum úr dós ásamt öllum safanum ofan í, tómatpúrru, 4 dl vatni og grænmetiskrafti. Hrærið og látið malla saman í 30-40 mínútur á vægum hita.
Blandið öllu vel saman með töfrasprota. Þá er súpan orðin vel þykk. Þynnið súpuna með 1-2 dl vatni og rjóma. Kryddið með cayenne, salti og pipar.
Berið fram með ólífuolíu, ferskri basilíku og ferskum mozzarella.

Ólífuolía með basilíku