Hagkaup hefur ákveðið að lengja afgreiðslutíma tveggja verslana sinna til að auðvelda viðskiptavinum sínum jólainnkaupin í ljósi áframhaldandi samkomutakmarkana í verslunum. Um er að ræða verslanir Hagkaups í Kringlunni og Smáralind sem verða nú opnar til klukkan 21 á virkum dögum og til klukkan 18 um helgar, frá og með deginum í dag, 19. nóvember.
Sigurður Reynaldsson, framkvæmdastjóri Hagkaups, segir að þetta sé einna helst gert til að dreifa álaginu í verslunum og koma frekar í veg fyrir raðir sem gætu myndast á annatímum. Þegar hefðbundin jólaopnun verslunarmiðstöðvanna hefst verður afgreiðslutíminn lengdur í takt við almennan afgreiðslutíma.
„Við teljum ljóst að flest okkar viljum halda jól með öllu því sem hátíðinni fylgir. Á síðustu vikum hefur aðgangsstýring inn í verslanir án efa gert það að verkum að mikil uppsöfnuð þörf er fyrir einstaklinga að komast út og framkvæma það sem fylgir hefðbundnu jólahaldi, þar á meðal matarinnkaup á aðventunni. Við hvetjum alla okkar viðskiptavini til að nýta sér þessa lengingu á afgreiðslutíma og þannig ná að versla inn fyrir jólin án mögulegra þrengsla og öngþveitis. Þá bendum við sérstaklega á að við verslanir okkar í Kringlunni og Smáralind er nóg af bílastæðum og verslanirnar það rúmgóðar að auðvelt er að athafna sig,“ bætir Sigurður við.
Enn sem áður verða verslanir í Garðabæ og Skeifunni opnar allan sólarhringinn. Að sama skapi verða verslanir Hagkaups í Spönginni, á Akureyri og Eiðistorgi opnar frá klukkan átta til 24. Einnig er netverslun Hagkaups alltaf opin þar sem hægt er að kaupa bæði matvöru og leikföng.