Mínípavlovur eru mögulega það allra snjallasta sem hægt er að bjóða upp á í desert. Þær eru ákaflega auðveldar í bakstri og svo ótrúlega fallegar á diski.
Það er engin önnur en Guðrún Ýr Eðvaldsdóttir á Döðlum & smjöri sem á heiðurinn af þessari uppskrift, sem er algjörlega upp í tíu!
Mínípavlovur
Botn
- 6 eggjahvítur
- 300 g sykur
- 2 tsk. maíssterkja (maizena)
- 1 tsk. sítrónusafi
- 1 tsk. vanilludropar
Aðferð:
- Stillið ofn á 105°C, efri og neðri hita.
- Byrjið á því að setja eggjahvíturnar í hrærivél og hræra létt saman í 1-2 mín.
- Bætið þá sykrinum saman við smá í einu og stífþeytið.
- Þegar hvíturnar og sykurinn eru orðin stífþeytt bætið þá afganginum af hráefnunum saman við og blandið þeim saman við með sleikju.
- Setjið 2-3 msk. fyrir hverja pavlovu á bökunarpappír, þegar þið hafið deilt þeim niður sléttið hliðarnar á þeim og búið til smá holu í miðju hverrar köku, pláss fyrir fyllinguna.
- Setjið inn í ofn í 1 klst og 15 mín. Slökkvið þá á ofninum og leyfið þeim að kólna í minnst 30 mín. í ofninum áður en hann er opnaður.
Kaffirjómi með Daim
- 1/2 l rjómi
- 4 msk. kaffi, kælt
- 1 msk. flórsykur
- 100 g Daim
Aðferð:
- Léttþeytið rjómann og blandið saman við hann kaffi og flórsykri og hrærið vel saman.
- Saxið súkkulaðið niður og blandið saman við rjómann.
Samsetning
Þegar pavlovurnar eru orðnar kaldar fyllið þær þá með kaffirjómanum og skreytið með berjum, súkkulaði-/karamellusósu eða því sem hugurinn girnist.
Guðrún Ýr Eðvaldsdóttir