Matur | mbl | 30.1.2021 | 14:01

Rosalegasti humarréttur síðari ára

Ljósmynd/Berglind Hreiðarsdóttir

Þetta er uppskrift sem fer beint í bókina enda skilgreinist hún sem skyldusmakk og veislusprengja – en það er skilgreiningin sem við notum um mat sem tekur matarboðið upp á næsta stig.

Það er Berglind Hreiðars á Gotteri.is sem á heiðurinn af þessari snilld og má því fastlega vænta þess að hún sé vinsælasti gestgjafinn á höfuðborgarsvæðinu um þessar mundir.

Humar tempura með chilimæjó

Orlydeig uppskrift

300 g hveiti
1½ tsk. lyftiduft
1½ tsk. salt
330 ml pilsner
2 egg
3 msk. ólífuolía

Aðferð:

Blandið öllum hráefnum saman í skál og pískið þar til jafningur hefur myndast, setjið í kæli á meðan annað er undirbúið en að minnsta kosti í 30 mínútur.

Humar – eldunaraðferð

Um 700 g skelflettur humar (fæst í næsta stórmarkaði)
salt, pipar og hvítlauksduft
steikingarolía (um 700 ml)

Aðferð:

Skolið og þerrið humarinn, kryddið með salti, pipar og hvítlauksdufti.
Setjið hann ofan í orlydeigið og veltið um þar með sleif þar til allir bitar eru hjúpaðir deigi.
Hitið steikingarolíuna þar til hún er vel heit og lækkið þá hitann niður í meðalháan. Gott er að prófa að setja smá orlydeig í pottinn til að gera „test“ og ef það fer strax að „bubbla“ vel er tímabært að lækka aðeins hitann og setja eins og 6-8 humarbita ofan í í einu í um 2 mínútur í senn eða þar til þeir verða gylltir (ég steikti á stillingu 7 af 9 hjá mér).
Gott er að nota kleinuspaða eða annan götóttan spaða til að veiða bitana upp úr pottinum, hrista olíuna vel af og leggja á nokkur lög af eldhúspappír til að umframolía leki af og bitarnir haldist stökkir.
Þræðið bitana upp á tréprik eða setjið þá á bakka, sprautið chilimajó yfir (og hafið auka slíkt í skál) og stráið vel af kóríander yfir og spírum ef þið viljið slíkar og gott er að kreista smá límónu yfir allt í lokin.