Einn vinsælasti Michelin-veitingastaðurinn í Kaupmannahöfn, Kadeau, hefur tekið stórkostlegum breytingum, svo ekki sé meira sagt.

Það voru OEO Studio sem endursköpuðu veitingastaðinn með dökkum jarðlitatónum. Kadeau opnaði fyrst dyrnar árið 2015 og hefur veitt gestum sínum stórkostlega upplifun í mat og drykk, og nú enn frekar í nýju umhverfi. Hér leika efni á borð við terracotta, brass og eik stórt hlutverk og tóna einstaklega vel saman.

Nýja upplifunin hefst áður en þú gengur inn á staðinn; áður fyrr var útidyrahurðin blá að lit en hefur nú verið máluð í mjúkum rauðum lit. Þess ber að geta að gestir þurfa að hringja dyrabjöllu fyrir utan veitingastaðinn og bíða þess að vera hleypt inn. Annað sem vekur áhuga fyrir utan útidyrahurðina og innréttingar eru sikksakkflísarnar á gólfi. Flísarnar ljá rýminu einstakan karakter á móti fallegu viðargólfinu og klassískum húsgögnum, og vekja mikla eftirtekt.