Sælgæti á sunnudegi – Geggjuð rifjasteik með fullkomnum ofnbökuðum kartöflum, soðsósu, karamelliseruðum nýpum og Yorkshire-búðingi!

Fyrir rifjasteikina

• 2,8 kg rifjasteik á beini
• 2 rauðir laukar
• 4 sellerísstangir
• 5 hvítlauksrif
• 4 gulrætur
• 4 lárviðarlauf
• 1 glas rauðvín
• 2 msk. jómfrúarolía
• salt og pipar

Fyrsta skrefið er að flysja grænmetið og skera það í grófa bita og setja í botninn á stórri ofnskúffu. Bætið við lárviðarlaufunum.

Nuddið steikina með jómfrúarolíu og saltið og piprið mjög ríkulega. Komið hitamæli fyrir í kjötinu og setjið í 120 gráðu heitan ofn og bakið þar til æskilegum kjarnhita er náð. Ég fór í 52 gráður og það tók tæpar tvær klukkustundir.

Sem gaf mér nægan tíma að huga að meðlætinu sem var fullkomnar ofnsteiktar kartöflur. Þetta er án efa eitt ljúffengasta meðlæti sem um getur.

Kartöflurnar

• 700 g kartöflur
• 2 msk. hveiti
• 3-4 matskeiðar andafita
• salt

Flysjið kartöflurnar og sjóðið í söltuðu vatni í sex til sjö mínútur. Hellið þeim yfir í sigti og hossið þeim aðeins í sigtinu til að ýfa upp ytra byrði kartöflunnar. Bætið við hveiti og hossið þeim aðeins meira þar til þær eru vel hjúpaðar.

Hitið andafituna á pönnu og steikið kartöflurnar þangað til þær taka lit. Setjið þær svo í eldfast mót og inn í 180 gráðu heitan ofn og bakið í klukkustund eða þar til þær eru orðnar fallega gullnar.

Svo átti ég nokkrar regnbogagulrætur og nýpur í ísskápnum sem þurfti að fara að nota. Þær voru flysjaðar, skornar í fjórðunga eftir lengdinni og lagðar í eldfast mót. Velt upp úr olíu, hunangi, salti og pipar og bakaðar í 180 gráðu heitum ofni í 45 mínútur.

Og þá var komið að Yorkshire-búðingum – sem í raun er enginn búðingur. Þetta eru brauðbollur.

Yorkshire-brauðbollur

• 4 egg
• 200 ml nýmjólk
• 200 g hveiti
• grænmetisolía
• 1/2 tsk. salt

Byrjið á því brjóta egg í skál og þeyta vandlega saman þannig að eggin lyfti sér aðeins. Hrærið mjólkina saman við. Sigtið hveitið saman við og blandið vandlega saman. Blandan á að minna á pönnukökudeig.

Hellið botnfylli af olíu í hvern bolla á bollakökumóti og setjið inn í 190 gráðu heitan ofn og hitið í rúmlega 15 mínútur. Takið mótið svo varlega út úr ofninum og hellið deiginu varlega ofan í mótin. Reynið að dreifa þessu sem jafnast á milli í mótinu. Setjið í 190 gráðu heitan ofn í 20-25 mínútur. Ekki kíkja inn í ofninn fyrr en undir lok bökunartímans, annars er hætt við að bollan falli.

Og úr verða þessar gullfallegu kökur.

Þegar kjötið er komið í 52 gráður fékk það að hvíla undir álpappír – en þá var að huga að sósunni.

Sósa

• 1 glas rauðvín
• 3 msk. hveiti (og maizenamjöl eftir smekk – eftir því hvað þú vilt þykka sósu)
• 1 l kjötsoð
• 50 g smjör
• 1 msk. dijonsinnep
• 1 tsk. sulta
• salt og pipar

Aðferð:

Ég beitti aðferð Jamies Olivers. Hún felst í því að nota allt grænmetið sem lá undir kjötinu á meðan það eldaðist og mauka það með kartöflustöppu. Næsta skref var að bæta rauðvíni saman við og sauð það upp á gashellu. Þá bætti ég sigtuðu hveiti saman við og hrærði saman við soðið. Bætti svo kjötsoðinu saman við og sauð upp á nýjan leik. Hellti því svo í gegnum sigti yfir í annan pott og sauð upp. Skóf fituna ofan af. Bragðbætti með dijon og sultu og salti og pipar. Í blálokin hræði ég smjörinu saman við til að fá fallegan gljáa á sósuna.

Blússhitaði ofninn. Á meðan hitinn reis bjó ég til sinnepsgljáa með því að blanda 3 matskeiðum af dijonsinnepi saman við 3 maukuð hvítlauksrif, 1 matskeið af hlynsírópi, salti og pipar. Smurði svo yfir kjötið og setti það svo aftur inn í ofninn í nokkrar mínútur.

Skar svo kjötið af rifjunum.

Og svo í þunnar sneiðar. Þetta var alveg ótrúlega ljúffengt. Það er eiginlega erfitt að lýsa því hversu ljúffengt það var að naga kjötið af rifjunum.