Hráefni:

• 250g kjúklingabaunir, þurrkaðar
• ½ laukur
• 1 hvítlauksrif
• 1 msk. fersk steinselja
• 2 msk. ferskt kóríander
• ¼ tsk cayennepipar
• ¼ tsk mulið kummín (cumin)
• ½ tsk mulin kóríanderfræ
• ¼ tsk mulin kardimomma
• ½ tsk matarsódi
• 1½ msk. hveiti
• olía til djúpsteikingar (líka hægt að gera í ofninum)
• salt eftir smekk

Enginn íburður hér á bæ. Bollurnar voru mátulega stökkar og héldust saman í þetta sinn enda kjúklingabaunirnar búnar að liggja í bleyti yfir nótt. Ljósmynd/Aðsend

Aðferð:

1. Það er mikilvægt að nota þurrkaðar kjúklingabaunir. Falafel úr dós dettur of auðveldlega í sundur. Á þessu höfum við brennt okkur.
2. Setjið kjúklingabaunir í stórt ílát, þekið með köldu vatni sem er a.m.k. tvöfalt rúmmál baunanna. Látið standa yfir nótt.
3. Daginn eftir, blandið saman baunum, lauk, hvítlauk, steinselju og kóríander. Gott er að setja þetta í hakkavél á fínustu stillingu tvisvar. Annars er hægt að nota matvinnsluvél og hakka þar til það er orðið mjög fínt en ekki orðið kremugt. Maukið á ekki að líkjast hnetusmjöri.
4. Blandið saman kryddi, salti (u.þ.b. ¾ tsk), hveiti og smá vatni (3 msk.). Látið bíða inni í ísskáp í klukkustund hið minnsta.
5. Hitið olíu upp í 180°C.
6. Bleytið nú hendur. Mótið kúlur á stærð við valhnetur með u.þ.b. einni matskeið af baununum. Munið að þrýsta vel þegar kúlurnar eru mótaðar, annars er hætt við að þær detti í sundur. (Hér er hægt að setja sesamfræ utan á falafelið ef þið viljið, en búið ykkur undir að hluti þess muni detta af og brenna í olíunni.)
7. Djúpsteikið í skömmtum þar til falafelið er orðið vel brúnt allan hringinn (u.þ.b. 4 mínútur).
8.  Setjið bollurnar á eldhúspappír til að ná sem mestri olíu úr þeim.
9. Berið fram.