Staðurinn býður upp á spennandi en um leið tilgerðarlausan mat sem hefur runnið vel niður hjá gestunum.Um er að ræða mikla byltingu fyrir gesti Kringlunnar en hingað til hefur sambærilegan stað vantað. Finnsson Bistro hentar vel fyrir fjölskyldur og fínni hópa, og er í raun, eins og Óskar bendir á, tveir veitingastaðir. Annars vegar er það Finnsson Bistro á daginn þar sem opið er yfir í Kringlu og leikur staðurinn þá veigamikið hlutverk í öllu umhverfinu. Á kvöldin er staðurinn hins vegar stúkaður af með tjöldum og engu líkara en gengið sé inn í aðra veröld. Rúsínan í pylsuendanum er svo hinn rómaði búbbluskáli en þar er eins og maður sé sestur úti í erlendri stórborg þar sem sólin skín og hitinn leikur við gesti. Óskar er þó ekki einn í brúnni því í reynd eru það börnin hans, Klara og Finnur, sem halda um stjórnartaumana og fara vel með það enda bæði þaulvön og bókstaflega alin upp í veitingabransanum.
Með í för eru svo Óskar og eiginkona hans, María Hjaltadóttir. Fjölskyldan bjó lengi erlendis og notaði þá eftirnafnið Finnsson eins og tíðkast víða erlendis. Því var ákveðið að veitingastaðurinn fengi það nafn enda fjölskylduveitingastaður.
Ljóst er að spennandi tímar eru fram undan hjá Finnsson bistro og miðað við viðtökur undanfarinna daga er ljóst að Kringlugestir og nærsveitungar taka þessari nýjung fagnandi.