Matur | Allir grilla | mbl | 18.6.2021 | 14:42

Lekkerasti grillréttur sem sést hefur lengi

Frábær grillréttur yfir sumartímann - kúrbítur með mangó salsa og sósu sem rífur í. mbl.is/Hildur Rut Ingimarsdóttir

Hér er á ferðinni gómsætur, sumarlegur og hollur réttur – eða grillaður kúrbítur með mangó salsa og cheddar osti. Habanero sósan setur síðan punktinn yfir i-ið og rífur aðeins í. Það er Hildur Rut á heiðurinn að þessum rétti og segir; „Það er frábær hugmynd að bera réttinn fram með grilluðum tígrisrækjum ef að þið eruð í þannig stuði. Þennan rétt ætla ég að gera aftur, ekki spurning!“

Grillréttur sem kitlar bragðlaukana (fyrir 2)

2 kúrbítar
Ólífuolía
Krónu krydd – Ertu ekki að grænast?
Salt & pipar
1 ferskur maískólfur
1 ½ dl svartar baunir
1 ½ dl Quinola express spicy mexican
1 dl rifinn cheddar ostur

Mangósalsa

1 avókadó
½ mangó
8 litlir tómatar
1 msk blaðlaukur
1 msk kóríander
Safi úr ½ lime

Sósa

3 msk. majónes
3 msk. sýrður rjómi
1-2 tsk. Habanero sósa frá Sauce shop
Safi úr ½ lime
¼ tsk hvítlauksduft
¼ tsk laukduft
Salt og pipar

Aðferð:

Byrjið á því að skera tómata, mangó, avókadó og blaðlauk smátt og blanda saman við safa úr lime.
Skerið maískornin af maískólfinum. Steikið upp úr olíu á pönnu í 3-5 mínútur og saltið og piprið. Blandið maískornunum saman við svartar baunir, kínóa og cheddar ost.
Hrærið öllum sósu hráefnunum saman í skál. Mæli með að smakka ykkur til með habanero sósuna, hún er mjög sterk.
Skerið kúrbít í tvennt og hreinsið innan úr honum með skeið. Penslið með ólífuolíu og kryddið með Ertu ekki að grænast, salti og pipar.
Grillið kúrbítinn í 4-6 mínútur á báðum hliðum eða þar til hann er kominn með góðar grillrendur.
Fyllið hann með kínóablöndunni og haldið áfram að grilla hann á vægum hita í 10-12 mínútur eða þar til hann er eldaður í gegn og osturinn bráðnaður. Þið getið einnig bakað hann í ofni við 200°C í 12-15 mínútur.
Toppið kúrbítinn með mangósalsanu og sósunni.