Það virðist ekkert lát á opnun spennandi veitingastaða hér á landi og nú í júlí verður Monkey's opnaður í húsnæðinu sem kennt er við Skelfiskmarkaðinn.
Staðurinn mun bjóða upp á japanska og perúvíska matargerð; svokallaða nikkei-matreiðslu, sem á uppruna að rekja til seinni hlutar 19. aldar.
Um er að ræða samruna japanskrar og perúskrar matargerðar sem hófst þegar japanskir innflytjendur byrjuðu að setjast að í Perú um 1860 en þar blönduðust aldagamlar matreiðsluaðferðir frá Japan saman við fjölbreytta matarkistu Perú. Nikkei-matreiðsla sameinar það besta úr hvorri matarhefð, svo sem virðingu fyrir hráefninu og samsetningu framandi bragðtegunda.
Þannig voru japanskir réttir tengdir bragði og eldunaraðferðum frumbyggja í Perú á aðdáunarverðan hátt. Þessi blanda felur í sér það besta úr glæsilegri og fíngerðri matarmenningu Japana ásamt afburðafersku hráefni, blandað kryddtöfrum Perú.
Það er engin önnur en Ólöf Ólafsdóttir sem á heiðurinn af glæsilegum eftirréttaseðli staðarins og við kíktum í heimsókn á dögunum og fengum að bragða á dásemdunum, sem við getum staðfest að eru stórkostlegar á bragðið. Það er því ljóst að matgæðingar eiga veislu í vændum þegar Monkey's verður opnaður á næstu vikum.