Spennandi matur á nýjum veitingastað í miðbænum

Veitingamaðurinn Arnór Bohic er hér með konu sinni Paola Cardenas …
Veitingamaðurinn Arnór Bohic er hér með konu sinni Paola Cardenas en hún er frá Síle og Kólumbíu. Eggert Jóhannesson

Nýtt bragð í bæinn

Stemningu frá Mið- og Suður-Ameríku má nú finna á Laugavegi en þar er nýr veitingastaður sem ber nafnið Selva.

Á horni Laugavegs og Bergstaðastrætis er hægt að gleyma íslenskum raunveruleika um stund því þegar gengið er inn um dyrnar á Selva er vel hægt að ímynda sér að maður sé staddur fyrir sunnan miðbaug. Selva er glænýr veitingastaður og bar sem sérhæfir sig í réttum og suðrænum kokteilum frá Mið- og Suður-Ameríku. Seiðandi latíntónlist fyllir loftið, stemningin er óneitanlega kósí og framandi réttir suðrænu álfunnar eru á diskum gesta, sumir þeirra hangandi á sérstökum spjótum.

Frá Kúbu til Argentínu

Arnór Bohic, eigandi og framkvæmdastjóri Selva, hefur verið í veitingageiranum í 27 ár en hann byrjaði átján ára sem barþjónn en lærði síðar veitingarekstur í hótelskóla í Sviss. Hann er afar ánægður með viðtökurnar en opnað var fyrir mánuði.

„Það er búið að ganga gríðarlega vel og fólk er ánægt með matinn og segir að nú sé komið nýtt bragð í bæinn. Það er líka ánægt með stemninguna en við spilum latíntónlist. Hugmyndin var að opna mið- og suðuramerískan stað en orðið Selva þýðir frumskógur í Amazon. Við innréttuðum staðinn svolítið með það í huga og höfum hér grænan plöntuvegg og bambustré er hér uppi á efri hæð,“ segir Arnór.

„Mig langaði að koma með nýtt konsept í matarmenninguna, en ég hafði verið í eitt ár sem skiptinemi í Venesúela og einnig hálft ár í Mexíkó. Í þessum löndum kynntist ég suðuramerískri menningu sem ég hef alltaf verið gríðarlega hrifinn af, bæði tónlistinni og matnum. Kona mín er frá Síle og Kólumbíu þannig að ég þekki vel þennan heimshluta. Kokkarnir hér eru frá Suður-Ameríku, annar frá Síle og hinn frá Venesúela,“ segir Arnór og segir þau fara vítt og breitt um álfuna í matargerðinni.

„Við leikum okkur með rétti í raun alveg frá Kúbu og niður til Argentínu. Við höfum valið rétti sem fólk kannski þekkir en sett okkar mark á þá. Þetta eru réttir sem gaman er að deila en margir réttir eru bornir fram skemmtilega á spjótum. Hér er allt lagað frá grunni; öll deig og allar sósur.“

Sextíu tegundir af rommi

Mikið úrval drykkja má finna á barnum, bæði vín, kokteila og romm.

„Á barnum er þjónn frá Kúbu að hrista kokteila. Selva er líka bar og hér eru margir góðir suðrænir kokteilar. Það verður opið hér til tvö um helgar þegar takmarkanir hætta og þá verður hér barstemning fram eftir nóttu. Öll vínin okkar eru frá Suður-Ameríku og erum við með skemmtilegasta rommsafnið í bænum. Við erum komin með yfir sextíu tegundir af rommi,“ segir Arnór.

„Hér hefur verið alveg fullt um helgar,“ segir Arnór og bætir við að opið sé frá klukkan fimm alla daga nema mánudaga.

mbl.is