Veitingastaðurinn KORE er löngu orðinn landsþekktur fyrir framúrskarandi mat sem er undir kóreskum áhrifum. Bragðsamsetningarnar á staðnum og útfærslurnar þykja til fyirmyndar en maðurinn í brúnni er hinn geðþekki Atli Snær sem er óþreytandi að því virðist í að þróa nýja rétti og bjóða gestum upp á spennandi mat.
Í dag ætla Atli Snær og félagar að venda kvæði sínu í kross og færa starfsfólki Landspítalans mat og má fastlega gera ráð fyrir að þeim verði vel tekið. „Okkur á KORE langar að láta gott af okkur leiða og skapa í leiðinni jákvætt umtal um veitingageirann. Þetta hefur vissulega verið erfiður tími hjá veitingaaðilum en við megum ekki týna okkur í neikvæðri umræðu. Við fengum alla okkar helstu birgja til að taka þátt í verkefninu með okkur og ætlum að gefa starfsfólki Landspítalans á bilinu 150-200 skammta í dag,“ segir Atli Snær, en markmiðið sé að bjóða upp á smá tilbreytingu á annasömum degi.