Matur | mbl | 28.3.2022 | 14:03

Kökurnar sem klárast strax í veislunni

Ljósmynd/Berglind Hreiðarsdóttir

Það er merkileg hvað einfaldar kökur á borð við þessa eru góðar og hvað þær eru vinsælar. Elskaðar af bæði ungum sem öldnum og eru alltaf fyrstar til að klárast.

Meistari Berglind Hreiðars á Gotteri.is á heiðurinn að þessar snilld sem mun slá í gegn hvar sem er.

„Mæli eignilega bara strax með að gera tvöfalda uppskrift því þetta er fljótt að fara, hvort sem þetta er bara inn í ísskáp fyrir fjölskylduna eða borið fram í veislu. Það er síðan um að gera að leika sér með liti á formum og kökuskrauti í stíl við þema hverju sinni,“ segir Bergind um uppskriftina og við hlýðum henni.

Cheerioskökur uppskrift

Um 20 stykki

50 g smjör
150 g suðusúkkulaði
220 g þykkt sýróp
130 g Cheerios
Kökuskraut

Aðferð:

Setjið smjör, súkkulaði og sýróp saman í pott og bræðið saman við meðalháan hita.
Þegar bráðið er gott að auka hitann aðeins í lokin og leyfa blöndunni að sjóða saman í um eina mínútu og slökkva síðan á hellunni.
Næst má setja Cheerios saman við, blanda vel saman við súkkulaðiblönduna, skipta síðan niður í pappaform og strá kökuskrauti yfir.
Gott er að geyma kökurnar síðan í kæli.