Matur | mbl | 27.5.2022 | 12:21 | Uppfært 12:45

Linda Ben bakaði brownie ársins

Ljósmynd/Linda Ben

„Hér höfum við þessa klassísku góðu brownie sem margir ættu að kannast við, en með alveg ótrúlega góðum stökkum snúning þar sem búið er að setja Bíó Kropp bæði í deigið og mylja það ofan á kökuna. Það gerir þessa klassísku blautu og klístruðu köku algjörlega ómótstæðilega!“ segir Linda Ben um þessa geggjuðu uppskrift.

„Kakan er afar einföld og þarf ekki hrærivél í að græja hana. Maður einfaldlega bræðir saman smjör og súkkulaði, blandar því saman við egg, sykur og hveiti. Bætir Bíó kroppinu út í og bakar. Svo toppar maður með meira Bíó kroppi og kakan er tilbúin. Hægt er að gera þessa köku daginn áður ef maður vill, en ég mæli samt alveg með því að borða hana volga nýbakaða með ís, það er bara eitthvað svo ómóstæðilegt við það."

Bíó Kropps-Brownie

200 g smjör
200 g suðusúkkulaði frá Nóa Síríus
3 egg
200 g sykur
50 g hveiti
200 g Bíó Kropp frá Nóa Síríus

Aðferð:

Kveikið á ofninum og stillið á 175°C, undir- og yfirhita.
Bræðið saman smjör og súkkulaði.
Hrærið saman eggin og sykurinn í annari skál.
Bætið súkkulaðiblöndunni út í eggjablönduna og hrærið saman, bætið hveitinu út í og hrærið.
Setjið 150 g Bíó kropp út í deigið og hrærið.
Setjið smjörpappír í 25×25 cm form (eða álíka stórt form) og hellið deiginu ofan í formið. Bakið í 30-35 mín eða þar til kantarnir eru byrjaðir að harðna en miðjan er ennþá mjúk.
Skerið 50 g Bíó kropp niður og dreifið yfir kökuna á meðan hún er ennþá heit. Kælið kökuna og skerið svo í bita.