Múffurnar sem eru fullkomnar í nestisboxið

Ljósmynd/Berglind Hreiðarsdóttir

„Ef það er eitthvað sem allir elska þá er það bananabrauð, það á að minnsta kosti við á þessu heimili! Þessar hér eru æðislegar og sniðugar í nestisboxið!“ segir Berglind Hreiðars á Gotteri.is um þessar múffur.

„Hver einasta kaka kláraðist á þessu heimili og stelpurnar nutu þeirra ýmist með mjólk eða smurðu þær með smjöri og osti. Hvort tveggja er alveg dásamlegt og ekki amalegt að eiga svona í frystinum til að grípa með í nesti!“

Bananamúffur

Um 20 stykki

  • 2 egg
  • 80 g sykur
  • 80 g púðursykur
  • 2-3 þroskaðir bananar
  • 130 g brætt smjör
  • 2 tsk. vanilludropar
  • 180 g hveiti
  • 2 tsk. lyftiduft
  • ½ tsk. matarsódi
  • ½ tsk. salt
  • 2 tsk. kanill

Aðferð:

  1. Hitið ofninn í 170°C.
  2. Þeytið saman báðar tegundir af sykri og egg þar til létt og ljóst.
  3. Stappið bananana og bætið þeim saman við ásamt bræddu smjöri og vanilludropum, hrærið varlega saman stutta stund.
  4. Að lokum má hræra öll þurrefni saman og setja saman við í nokkrum skömmtum.
  5. Hrærið rétt nógu lengi til að deigið samlagist. Ekki lengur.
  6. Skiptið niður í bollakökuform og bakið í um 15 mínútur eða þar til kantarnir á kökunum fara að gyllast.
  7. Gott er að smyrja kökuna með smjöri og setja ost á þegar hún er höfð í nesti.
Ljósmynd/Berglind Hreiðarsdóttir
mbl.is