Matur | mbl | 6.9.2022 | 14:09

Rjómalöguð brokkolísúpa með osti

Ljósmynd/Helena Gunnars

Hér er á ferðinni hin fullkomna haustsúpa sem hlýjar okkur inn að hjartarótum. Rjómalöguð og dásamleg með ljúfu ostabragði. Camembert smurosturinn passar einstaklega vel í þessa súpu, auk þess sem hann gefur henni ljúffengt bragð, þykkir hann súpuna og gefur henni silkimjúka áferð. Það er engin önnur en Helena Gunnarsdóttir sem á heiðurinn að uppskriftinni.

Rjómalöguð brokkolísúpa með osti

2 msk. smjör
1 stk. laukur
2 stk. brokkolíhöfuð, eða tvö minni
500 ml matreiðslurjómi eða rjómi frá Gott í matinn
500 ml vatn
2 msk. kjúklinga- eða grænmetiskraftur
300 g Camembert smurostur, 1 dós
1 tsk. paprikukrydd
salt og pipar eftir smekk
rifinn cheddar ostur frá Gott í matinn

Aðferð:

Skerið laukinn smátt og steikið í potti upp úr smjörinu þar til hann mýkist.
Skerið allt brokkolíið í litla bita en geymið efsta partinn (blómin) þar til seinna. Setjið stilkana gróft saxaða í pottinn og hellið yfir rjóma og vatni ásamt kraftinum. Leyfið þessu að sjóða í 5-10 mínútur eða þar til brokkolíið er soðið í gegn.
Maukið súpuna nú með töfrasprota eða setjið í matvinnsluvél.
Setjið súpuna aftur yfir hitann og bætið smurostinum saman við ásamt kryddinu og efsta hlutanum af brokkolíinu.
Leyfið þessu að malla við vægan hita í 10 mínútur og smakkið ykkur til.
Berið súpuna fram með rifnum cheddar osti og hrærið einnig dálitlum rifnum osti saman við súpuna.