Matur | mbl | 27.9.2022 | 11:01

Uppskriftin sem varð óvart til en allir elskuðu

Ljósmynd/Berglind Hreiðarsdóttir

Oftar en ekki byrjum við daginn með nokkuð háleitar og skýrar hugmyndir um hvað við ætlum að hafa í kvöldmat. Endrum og eins fer þó ekki allt eins og við ætluðum okkur.

„Um daginn tók ég út hakk úr frystinum og planið var að gera hakk og spagettí í kvöldmat. Síðan rann dagurinn frá mér og ég hafði ekki komist í búð til að kaupa pastasósu né spagettí og var ég næstum hætt við að nota hakkið. Ég ákvað að sjá hvað væri til í kotinu og viti menn, úr varð þessi undurljúffenga grýta sem kláraðist upp til agna!“ segir Berglind Hreiðars á Gotteri.is um þessa dýrindis grýtu sem við megum til með að prófa.

Kósígrýta

1 laukur
500 g nautahakk
100 g pastaslaufur
100 g fyllt ostapasta
5 msk. tómatsósa
400 ml rjómi
100 g pizzaostur
1 msk. oreganó
salt, pipar, paprikukrydd og hvítlaukskrydd eftir smekk
ólífuolía til steikingar
parmesanostur yfir í lokin (má sleppa)

Aðferð:

Sjóðið báðar tegundir af pasta á meðan þið eldið hakkið sjálft.
Saxið laukinn mjög smátt (þá fatta krakkar ekki að það sé laukur í matnum).
Steikið lauk og nautahakk upp úr ólífuolíu, kryddið eftir smekk.
Hellið tómatsósu, rjóma og pítsuosti á pönnuna og hrærið vel þar til osturinn er bráðinn og rjómakennd sósa myndast, bætið oreganó á pönnuna og frekara kryddi eftir smekk.
Sigtið pastað og bætið saman við.
Þeir sem vilja geta síðan rifið parmesanost yfir allt saman!