Hér sjáum við einstaklega smart eldhús sem tikkar í mörg box - en hrásteypan í húsinu fær að njóta sín í rýminu og kemur virkilega vel út. 

Eldhúsið er í grunninn svart, þá bæði skápar og skúffur sem og borðplata og hillur. Hér fær steypan að njóta sín á veggjum og á flotuðu gólfinu - en andspænis innréttingunni er eldhúsborð og bólstraður bekkur fyrir húsráðendur að sitja á.

Blöndunartækin eru krómuð og tækin eru svört sem falla vel inn í háan skápavegg úr viði. Hér spilar viðurinn stórt hlutverk í rýminu og gefur heildarútlitinu þennan hlýja sjarma sem eldhúsið býr yfir.