Lax klikkar aldrei og hvað þá ef hann er borinn fram með dýrindis hollandaise-sósu en sú bragðpörun klikkar aldrei. Það er Berglind Hreiðars á Gotteri.is sem á heiðurinn að þessari einföldu uppskrift sem hittir alveg í mark. Með þessu ber hún fram smjörsteiktan aspas en hún bendir jafnframt á að auðvelt sé að bæta soðnum kartöflum við til að gera máltíðina saðsamari.
Lax með aspas og hollandaise-sósu
Fyrir um 4-6 manns
Hollandaise-sósa uppskrift
- 2 pk. TORO hollandaise-sósa
- 150 g smjör
- 300 ml vatn
- 200 ml nýmjólk
- 2 tsk. sítrónusafi
- Pipar eftir smekk
Aðferð:
- Bræðið smjörið í potti og hrærið sósuduftinu saman við.
- Setjið vatn og mjólk næst saman við. Þegar vökvinn nær suðumarki, lækkið hitann vel og leyfið að malla.
- Bragðbætið sósuna með sítrónusafa og pipar eftir smekk.
- Gott er að leyfa sósunni að malla á meðan þið útbúið aspasinn og laxinn.
Smjörsteiktur aspas
- Um 600 g ferskur aspas
- Um 70 g smjör
- 3 hvítlauksrif
- Salt og pipar
Aðferð:
- Skerið endana af stönglunum og steikið aspasinn upp úr smjöri við miðlungshita í nokkrar mínútur eða þar til hann fer að mýkjast.
- Rífið hvítlaukinn þá niður og bætið á pönnuna og kryddið með salti og pipar.
- Steikið aðeins áfram eða þar til hvítlaukurinn ilmar vel og aspasinn er orðinn mjúkur.
- Færið aspasinn yfir á fat/diska og steikið næst laxinn.
Lax
- Um 1200 g laxaflök/bitar
- Smjör og ólífuolía til steikingar
- Salt, pipar og fiskikrydd
Aðferð:
- Verið búin að roðfletta og þerra laxabitana vel áður en þið hefjist handa.
- Setjið pönnu á eldavélarhelluna og stillið á háan hita. Þegar pannan er orðin heit, setjið ríflega af smjöri í bland við ólífuolíu á pönnuna.
- Steikið fiskinn í 2-3 mínútur á hvorri hlið eða þar til hann er bleikur í gegn.
- Kryddið eftir smekk á báðum hliðum.
- Færið yfir á disk og njótið með aspas og hollandaise-sósu.
Ljósmynd/Berglind Hreiðarsdóttir