Matur | mbl | 22.1.2023 | 13:33

Sextug og aldrei litið betur út

Ljósmynd/Demi Moore Instagram

Leikkonan Demi Moore hefur verið áberandi svo áratugum skiptir enda ein þekktasta leikkona heims.

Demi fagnaði sextugsafmæli sínu í nóvember í fyrra og gefur lítið fyrir þær úreltu hugmyndir að konur eigi að vera orðnar gamlar um sextugt.

Sjálf hefur Demi sagst hafa prófað flesta öfga sem til eru í mataræði og á tímabili hafi hún upplifað svo mikinn þrýsting um að vera grönn að mataræði hennar hafi bókstaflega verið hálfur bolli af höfrum á morgnanna og síðan eitthvað smá af grænmeti og próteinum yfir daginn. Kolvetni hafi verið bönnuð.

Eins hafi hún verið heltekin af líkamsrækt og eytt flestum stundum í líkamsræktarherbergi heimilisins þegar hún var ekki að vinna. Henni hafi legið svo á að komast í gott form eftir að hún eignaðist dóttur sína Scout, að hún hafi misst mjólkina.

Hún hafi hins vegar fengið hugljómun í aðdraganda kvikmyndarinnar G.I. Jane. Þá hafi hún þurft að bæta á sig vöðvamassa og rakaði um leið af sér hárið. Hún hafi þá ákveðið að henni væri betur komið í sinni kjörþyngd í stað þess að vera stöðugt að berjast við að vera við hungurmörk.

Hún hafi í kjölfarið endurskoðað ansi margt í lífinu og farið að iðka hugleiðslu og sjálfsrækt í öllu mildara formi en verið hafði. Hún hafi breytt líkamsræktarherberginu í heimaskrifstofu og aldrei séð eftir því.

Í dag leggur Demi mikið upp úr útlitinu og hugsar vel um sig. Andlit hennar er merkilega slétt og ber þess merki að strekkt hafi veri á því og fyllt upp í spurngur. Mataræðið er ákaflega mikilvægt en Demi borðar engar dýraafurðir og það vill svo skemmtilega til að kærasti hennar er eigandi frægasta vegan veitingastaðar heims.