Matur | mbl | 13.4.2023 | 5:07

Morgunrútína einkaþjálfarans

Konráð Valur Gíslason, einkaþjálfari í World Class hefur komið fólki í ótrúlega gott form. Ljósmynd/Mummi Lú

Einkaþjálfarinn Konráð Valur Gíslason er einn vinsælasti og reynslumesti einkaþjálfari landsins en hann hefur starfað sem slíkur í hartnær aldarfjórðung. Konráð - eða Konni eins og hann er alla jafna kallaður - er mikill áhugamaður um heilbrigðan lífsstíl og næringu og okkur lék forvitni á að vita hvaða bætiefni hann tekur inn og hvernig morgunrútínan hjá honum er.

„Ég hef starfað sem einkaþjálfari í World Class síðustu 24 árin og vinsælustu tímarnir hjá mér hafa oftar en ekki verið kl 6.00 á morgnana. Oftast er þetta fólk sem þarf að mæta í vinnu kl 8.00 og finnst því nauðsynlegt að byrja daginn þetta snemma svo þau hafi tíma fyrir góða æfingu, sturtu og svo máltíð áður en það mætir í vinnuna,“ segir Konráð en hann segist hafa prófað alls kyns rútínur í gegnum tíðina og prófað ansi margt með það að leiðarljósi að finna út hvað virkaði best fyrir hann. Sú rútína sé nú fullmótuð og henti honum vel.

Frétt af mbl.is

„Meðan við borðum 80% holla fæðu þá er í lagi að leyfa sér aðeins inn á milli“

„Ég vakna kl 4.50 á morgnana og byrja á því að fá mér eplaedik (15ml), sítrónusafa (15ml) og engifersafa (30ml). Þessu blanda ég saman í glas og tek þetta eins og skot og drekk svo 2 glös af vatni í beinu framhaldi. Eftir þetta fer ég svo í kalda sturtu, ég byrja á því að fara
í volga sturtu sem ég svo trappa niður þar til að ég er kominn í ískalt steypibað og þar þrauka ég í ca 30 sek. Þetta er svona 7 mínútna ferli.

Ég fæ mér morgunmat alla morgna nema það sé æfing hjá mér kl 7.00, þá borða ég frekar eftir æfingu.

Morgunmaturinn er alltaf eins; fjögur egg á pönnu sem krydduð eru með Himalyan salti, svörtum pipar og túrmerik og smá grænmeti með (fer eftir því hvað er til í ísskápnum hverju sinni).

Ég tek þessi vítamín með morgunmatnum.

NMN (1000mg)
Alpha Lipoid acid (600mg)
D3 og K2 (5000iu)
Spermidine (10mg)
Magnesium glycerinate (400mg)
C vítamín (1000mg)
Þarahylki (1060mg)
Resveratrol (1000mg)
Quercetin og Bromelain (800mg)

Resveratrol og Quercetin blanda ég saman við eins og eina matskeið af grískri jógúrt og borða ásamt handfylli af bláberjum.

Með morgunmatnum er ég að drekka mikið af vatni (ca 500ml) sem ég blanda út í steinefnablöndu ríka af potassium.

Ég tek nokkrar léttar teygjur eftir matinn sem miðast að því að opna mjaðmir, bringu og herðablöð þetta tekur kannski 7-10 mínútur og er algjörlega þess virði.

Ég drekk ekki kaffi eða aðra koffín drykki fyrr en klukkustund eftir að ég fer á fætur til að gefa líkamanum færi á því að vakna almennilega sjálfur.“