Eins og fram kom á Matarvefnum á dögunum stóð Indverska sendiráðið á Íslandi fyrir því að fagna Alþjóðlegu ári hirsi 2023 með skemmtilegum hætti. Sendiherra Indlands á Íslandi, Shri B. Shyam og frú Ramya Shyam buðu til fögnuðar í Hússtjórnarskólanum í Reykjavík þar sem hirsi var í forgrunni og kynnt til leiks. Indverska sendiherrafrúin sá um að útbúa nokkra sælkerakræsingar sem boðið var upp á og deilir hér með lesendum nokkrum af uppskriftunum af því sem í boði var sem birtast á næstu dögum. Fyrsta uppskriftin frá frú Ramya Shyam er þessi ljómandi góða indverska súkkulaðikaka sem er vegan og bráðholl.
Indversk súkkulaði kaka
- ¾ bolli *Ragi hveiti
- 2 msk. ósykrað kakóduft
- 2 vel þroskaðir bananar
- ¼ bolli púðursykur
- ¼ bolli jógúrt - vegan jógúrt
- ¼ bolli olía að eigin vali
- 1 tsk. lyftiduft
- ½ tsk. matarsódi
- ¼ tsk. salt
- 1 tsk. *Pure Vanilla Extract eða vanilludropar
- Jarðarber eða ber að eigin vali til skrauts.
Aðferð:
- Forhitið ofninn í 180°C.
- Útbúið hringlaga baksturform, smyrjið formið og stráið með hveiti létt í botninn eða notið bökunarpappír.
- Þurrristið hirsimjölið í 5 til 7 mínútur á lágum hita.
- Sigtið og blandið öllum þurrefnunum saman (hveiti, kakóduftinu, lyftiduftinu, matarsódanum og salti).
- Í annarri skál, stappið banana saman við púðursykurinn til dæmis með kartöflustappara.
- Þeytið svo saman olíu, jógúrti og vanilludropum.
- Bætið hveitiblöndunni saman við og hrærið vel og fallega saman.
- Hellið deiginu yfir í formið og bakið í um það bil 25-30 mínútur við 180°C hita.
- Eftir 25 mínútur stingið tannstöngli/bökunarprjóni í miðjuna.
- Ef að pinninn/prjóninn kemur hreinn út eða deigð molnar þá er kakan tilbúin.
- Ef deigið festist við, bakið þá í 10 mínútur til viðbótar.
- Þegar kakan er tilbúin þá skaltu taka kökuna út úr ofninum og eftir um það bil 2 mínútna hvíld skaltu taka kökuna úr forminu og láta hana kólna.
- Skreytið og toppið með berjum að eigin vali rétt áður en kakan er borin fram.
*Pure Vanilla Extract fæst í verslunni Allt í köku eða stórmörkuðum.
*Ragi hveiti - Möndlumjöl eða spelt geta komið í stað Ragi hveitis ef það reynist erfitt að fá það hérlendis.
*Ragi hveiti eða Finger Millets er mikilvægt hirsi sem er ræktað mikið á ýmsum svæðum Indlands og Afríku. Finger Millets eða Ragi þykir mjög heilsusamlegt vegna ríkulegs næringargildis sem hefur góð áhrif á heilsuna og blóðsykurinn.