Ómótstæðileg ostamús með rjóma
Ómótstæðilega girnileg ostamúsin hennar Thelmu með engiferkeim sem minnir á jólin.
Ljósmynd/Thelma Þorbergsdóttir
Setja bókamerki
Tengdar fréttir
Uppskriftir
Krydduð ostamús er ómótstæðilegur eftirréttur að vetri til og í kringum hátíðirnar sem tekur um 15 mínútur að framreiða og kemur úr smiðju Thelmu Þorbergsdóttur uppskriftahöfundar sem heldur úti vefsíðunni Freistingar Thelmu. Hátíðlegur keimur af ostamúsinni með engiferkökum í botninum og mjúkum rjómanum kitlar bragðlaukana og minnir á jólin. Þrátt fyrir kryddkeiminn er ostamúsin einstaklega létt og góð og allir sælkerar eiga eftir að dá þessa mús.
Ostamús með rjóma
Fyrir 6
- 8 stk. engiferkökur
- 30 g smjör
- 500 ml rjómi frá Gott í matinn
- 250 g rjómaostur til matargerðar frá Gott í matinn
- 70 g sykur
- 2 msk. síróp
- 1 tsk. vanilludropar
- 1 tsk. kanill
- 1⁄4 tsk. múskat
- 1⁄4 tsk. engifer
- 3⁄25 tsk. negull
- 3⁄25 tsk. kardimommur
Ofan á
- Rjómi frá Gott í matinn, eftir smekk
- Flórsykur (2 msk.)
- Kanilstöng
- Rósmarín, ein grein í hvert glas/skál
- Muldar engiferkökur eftir smekk
Aðferð:
- Myljið kökurnar gróflega, bræðið smjör, blandið því saman við og hrærið öllu saman.
- Setjið 2 msk. af engiferkökum í botninn á hverju glasi fyrir sig. Skammturinn dugar í sex glös.
- Þeytið rjóma þar til hann er orðinn stífur og stendur. Takið helminginn til hliðar til þess að setja á toppinn.
- Þeytið rjómaostinn ásamt sírópi, vanilludropum og öllu kryddi.
- Blandið helmingnum af þeytta rjómanum saman við og hrærið saman með sleif.
- Setjið blönduna í sprautupoka og sprautið yfir engiferkökurnar.
- Blandið flórsykri saman við það sem eftir er af rjómanum og hrærið varlega saman.
- Setjið rjómann í sprautupoka og sprautið honum fallega ofan á ostamúsina.
- Skreytið með kanilstöng, rósmarín og muldum engiferkökum.
- Geymið glösin í kæli þar til ostamúsin er borin fram.
Tengdar fréttir
Uppskriftir
