Matur | mbl | 13.7.2024 | 12:30

Marensterta með sumarívafi

Marensterta með sumarlegu ívafi, með þeyttum rjóma, ferskum jarðarberjum og bláberjum ásamt syndsamlega góðri karamellusósu. Ljósmynd/Helena Gunnarsdóttir

Þessi dásemdar marensterta er með sumarlegu ívafi og passar vel til að bjóða upp á í sumarfríinu eða mæta með í næsta sumarboð. Þetta er marensterta með rjóma, ferskum berjum, Daim súkkulaði og fílakaramellusósu sem tikkar í öll boxin og er jafn klassísk og íslenska sumarkonan. Helena Gunnarsdóttir hjá Eldhúsperlum á heiðurinn af uppskriftinni en hún gerði hana fyrir uppskriftavefinn Gott í matinn.

Ein allra vinsælasta tertan á veisluborðum er einmitt marens, það er líka alveg ótrúlega einfalt að gera marenstertu og á flestra færi. Best er að gera botnana daginn áður en bera á tertuna fram. Auk þess er gott að setja á tertuna 6-8 klukkustundum áður en það á að bera dýrðina fram.

Langar þig í þessa marensbombu í næsta sumarboði? Ljósmynd/Helena Gunnarsdóttir

Marensterta með sumarívafi

Marensbotnar

5 eggjahvítur
150 g sykur
150 g púðursykur
¼ tsk. vínsteinslyftiduft

Aðferð:

Byrjið á því að hita ofninn í 120°C með blæstri og leggið bökunarpappír á tvær bökunarplötur.
Þeytið saman eggjahvítur, sykur, púðursykur og vínsteinslyftiduft þar til sykurinn leysist upp og úr verður þykkur marens. Mælt er með að þeyta marensinn á mesta hraða í hrærivél í 5-7 mínútur.
Skiptið marensinum jafnt á plöturnar tvær og mótið tvo fallega botna u.þ.b. 20 cm í þvermál.
Bakið í 70 mínútur. Slökkvið þá á ofninum og opnið smá rifu á hurðina.
Leyfið að kólna alveg í ofninum, helst yfir nótt.

Fylling

7 dl rjómi
Daim kurl eða annað súkkulaði
Bláber og jarðarber (sett á milli botnana)

Aðferð:

Bræðið fílakaramellur í rjómanum við vægan hita í potti.
Setjið til hliðar og kælið.
Geymið berin þar til tertan er sett saman.

Ofan á

½ dl rjómi
125 g fílakaramellur (hálfur poki)
Bláber og jarðarber

Aðferð og samsetning tertunnar:

Þeytið rjómann.
Setjið helminginn af rjómanum á annan botninn, dreifið hökkuðum Daim, jarðarberjum og bláberjum yfir ásamt smá fílakaramellusósu.
Leggið hinn botninn ofan á.
Setjið á rjóma og skreytið fallega með berjum.
Dreifið að lokum karamellusósunni yfir.
Gott að er að setja marenstertuna saman 6-8 klukkustundum áður en hún er borin fram.