Matur | mbl | 3.12.2024 | 12:00

Súpergóð krispí túnfiskskál

Þessi er súpergóð og þeir sem elska túnfisk verða að prófa. Ljósmynd/Hildur Rut Ingimarsdóttir

Þessi krispí túnfiskskál á eftir að koma á óvart. Það tekur enga stund að útbúa réttinn og hann er mjög bragðgóður. Það er tilvalið að fá sér þessa í hádeginu eða sem léttan kvöldverð. Í réttinum eru stökk hrísgrjón, túnfiskur, japanskt majónes, sriracha-dressing, gúrka og avókadó sem er ljúffeng blanda. Heiðurinn að uppskriftinni á Hildur Rut Ingimarsdóttir en hún gerði réttinn fyrir uppskriftavefinn Gerum daginn girnilegan.

Krispí túnfiskskál

3 dl elduð hrísgrjón
2 msk. sojasósa (1-2 msk. eftir smekk)
1 msk. sesamolía
1 msk. Tabasco Sriracha-sósa eða magn eftir smekk
1 stk. túnfiskur í dós (100-180 g)
2 msk. japanskt majónes (2-3 msk. eftir smekk)
Pipar eftir smekk
Gúrka eftir smekk
Kóríander eftir smekk
½ stk. avókadó
Everything bagel-krydd, sesamgaldur eða annað sambærilegt krydd

Aðferð:

Byrjið á því að blanda saman hrísgrjónum, sojasósu, sesamolíu og Sriracha-sósu.
Dreifið hrísgrjónunum á bökunarplötu þakta bökunarpappír og bakið í 25-30 mínútur við 190°C hita eða þar til hrísgrjónin eru orðin stökk og gyllt.
Opnið túnfiskdósina og tæmið vökvann.
Blandið túnfisknum saman við japanskt majónes, Tabasco Sriracha-sósu og kryddið með pipar eftir smekk.
Skerið gúrkuna og avókadóið í bita.
Setjið hrísgrjónin í botn á skál, leggið túnfiskblönduna ofan á þau og bætið síðan við gúrku, avókadó, kóríander og kryddið með Everything bagel-kryddi.
Berið fram og njótið.