Matur | mbl | 14.12.2024 | 12:00

Lagtertan hans Stefáns sem boðið er upp á á jóladagsmorgun

Lagtertan með smjörkremi er í uppáhaldi hjá Stefáni og borin fram með heitu kakói á jóladagsmorgni á hans heimili. mbl.is/Árni Sæberg

Stefán Pétur Bachmann Bjarnason bakari hjá Hygge coffee and micro bakery svipti hulunni af sinni uppáhaldslagtertu á dögunum í viðtali hjá undirritaðri í Morgunblaðinu. Hann er að eigin sögn jólabarn og nýtur þess að baka kræsingar sem minna hann á bernskuárin á jólunum.

Frétt af mbl.is

Bakaraþríeykið er komið í jólaskap

Stefán deilir með lesendum uppskrift að lagköku með smjörkremi. „Þessi er í miklu uppáhaldi hjá mér og er ómissandi með heitu kakói á jóladagsmorgun,“ segir Stefán og brosir.

Lagterta með smjörkremi

1070 g hveiti
320 g smjörlíki
320 g smjör
430 g sykur
2 stk. egg
430 g síróp
35 g lyftiduft
40 g matarsódi
20 g negull
25 g kakó
25 g kanill

Aðferð:

Setjið allt hráefnið saman í hrærivélarskál og vinnið saman með spaðanum og geymið síðan inni í kæli yfir nótt.
Rúllið daginn eftir á tvær bökunarplötur og bakið á 200°C hita með blæstri í 8 mínútur. Kælið síðan plöturnar niður og skerið til helminga.

Smjörkrem

540 g smjör
180 g smjörlíki
720 g flórsykur
55 g mjólk
11 g vanilludropar

Aðferð:

Vinnið allt saman í hrærivél með spaðanum þar til kremið er orðið ljóst og loftkennt.
Munið eftir að skafa reglulega niður kantana á hrærivélarskálinni.

Samsetning

Leggið einn helminginn af botni á skurðarbretti eða bökunarpappír og smyrjið 500 g af smjörkremi ofan á hann jafnt.
Leggið síðan annan helming af botni ofan á og smyrjið 500 g af smjörkremi ofan á hann jafnt.
Endurtakið þetta einu sinni enn og leggið svo síðasta botninn yfir, það eiga að verða þrjú lög af smjörkremi og fjögur lög af kökubotnum á endanum.
Látið tertuna standa yfir nótt með plast yfir sér áður en þið skerið hana niður í viðeigandi stærðir.