Matur | Morgunblaðið | 23.12.2024 | 18:00

Sælgæti sem passar vel með hátíðarmatnum

Þetta rauðkál er tilvalið að gera daginn áður því þá nær það að draga í sig kryddið og bragðið verður dýpra fyrir vikið. Upplagt að útbúa það í dag, Þorláksmessu og eiga það yfir jólin. mbl.is/Hanna Ingibjörg Arnarsdóttir

Á jólum og áramótum er öllu tjaldað til í mat og drykk. Flestir eru vanafastir og halda í hefðirnar en tilvalið er að finna einhverjar nýjar og spennandi uppskriftir til að bera fram með matnum. Löng hefð er fyrir því að hafa rauðkál og rauðrófur á þessum árstíma en það jafnast fátt á við að hafa þessar kræsingar heimalagaðar. Eins getur gott jólamauk lyft steikinni í hæstu hæðir. Hér bjóðum við upp á dásamlega uppskrift úr rauðu og jólalegu hráefni sem gera allan hátíðarmat enn betri.

Þetta rauðkál er tilvalið að gera daginn áður því þá nær það að draga í sig kryddið og bragðið verður dýpra fyrir vikið. Rauðkálið er bæði gott heitt og kalt. Uppskriftin ætti duga vel sem meðlæti fyrir fjóra.

Heimagert jólarauðkál með eplum og kanil

1 lítill haus rauðkál eða ½ stór, skorið í þunnar ræmur
1 grænt epli, afhýtt og rifið
2 msk. granateplasíróp (eða trönuberjasafi)
40 ml eplaedik
40 ml balsamedik eða rauðvínsedik
3 msk. púðursykur
2 tsk. salt
1 kanilstöng

Aðferð:

Setjið allt hráefnið í stóran pott og látið sjóða í u.þ.b. 5 mínútur, hrærið í á meðan. Setjið lok yfir og lækkið hitann, látið sjóða við vægan hita í 40-45 mínútur.
Hrærið reglulega í og bætið við ögn af vatni ef þurfa þykir. Þegar u.þ.b. 5 mínútur eru eftir af suðutímanum, smakkið þá til og bætið við sýru, sætu eða kryddi ef þurfa þykir.
Þegar rauðkálið er orðið mjúkt, þykkt og glansandi er það tilbúið til að bera fram.
Það geymist vel í ísskáp í u.þ.b. 5 daga í vel lokuðu íláti og því tilvalið að gera það á Þorláksmessu.