Matur | mbl | 10.2.2025 | 18:30

Þessi dýrðlegi þorskhnakki úr smiðju Eyþórs á eftir að slá í gegn

Synsamlega ljúffengur þorskhnakki með kóríandersósu borinn fram með steiktum kartöflum, spínati og baunaspírum úr smiðju Eyþórs Rúnarssonar. Ljósmynd/Eyþór Rúnarsson

Hér erum við að tala um steiktan þorskhnakka með kóríandersósu sem bráðnar í munni sem erfitt er fyrir sælkera að standast. Þessi uppskrift frá Eyþóri Rúnarssyni matreiðslumeistara og yfirkokki á Múlakaffi sem heldur úti heimasíðunni Eyþór kokkur.

Með þorskhnakkanum ber Eyþór fram steiktar kartöflur með spínati og baunaspírum, sem passar mjög vel með kóríandersósunni.

Eyþór Rúnarsson er yfirkokkur á Múlakaffi og heldur líka úti uppskriftavef þar sem hann deilir með lesendum sínum uppáhaldsuppskriftum. mbl.is/Arnþór Birkisson

Steiktur þorskhnakki með kóríandersósu og steiktum kartöflum með spínati og baunaspírum

Þorskhnakkar

800 g þorskhnakkar
100 g gróft salt
100 g smjör
Ólífuolía
Svartur pipar úr kvörn eftir smekk

Aðferð:

Setjið þorskhnakkann á bökunarplötu og saltið yfir og undir hann með grófa saltinu og látið hann standa á honum í 20 mínútur.
Skolið saltið af þorskhnakkanum með köldu vatni og þerrið hann með eldhúsbréfi.
Skerið hnakkann í 4 steikur og hitið pönnu með vel af ólífuolíu.
Setjið þorskinn á heita pönnuna og steikið í um það bil 3 mínútur eða þar til hann er orðinn gylltur og fallegur.
Snúið steikunum við og bætið smjörinu út á pönnuna og ausið því yfir á meðan þið steikið hnakkann í ca 4 mínútur í viðbót, eða þar til hann er eldaður í gegn.

Steiktar kartöflur með spínati og baunaspírum

800 g soðnar kartöflur (gullauga)
½ rauður chili (gróft skorinn)
1 stk. rauðlaukur (skrældur og gróft skorinn)
1 pk. spínat
4 msk. sojasósa
20 g smjör
½ box baunaspírur
½ búnt kóríander (gróft skorinn)
Ólífuolía eftir smekk
Sjávarsalt eftir smekk
Svartur pipar eftir smekk

Aðferð:

Skerið kartöflurnar í 6 til 8 hluta og setjið á pönnuna með vel af ólífuolíu og steikið þar til kartöflurnar eru farnar að gyllast að utan.
Bætið smjöri, chili og rauðlauknum út á pönnuna og steikið í um það bil 3 mínútur í viðbót.
Hellið sojasósunni út á pönnuna og smakkið allt til með salti og pipar eftir smekk. Blandið spínatinu, baunaspírunum og kóríander út í í lokin.

Kóríandersósa

2 stk. hvítlauksrif (fínt skorin)
1 stk. laukur (fínt skorinn)
1 msk. engifer (fínt skorið)
3 msk. hrísgrjónaedik
3 msk. sojasósa
2 msk. fiskisósa
1 dós kókosmjólk (400 ml)
5 stilkar fínt skorinn kóríander
1 stk. límóna
Ólífuolía til steikingar
Sjávarsalt eftir smekk
Svartur pipar úr kvörn eftir smekk

Aðferð:

Hitið pott með olíu í og steikið laukinn, hvítlaukinn og engiferið saman þar til það er mjúkt í gegn.
Bætið svo edikinu, fiskisósunni og sojasósunni í pottinn og látið sjóða í 2 mínútur.
Hellið því næst kókosmjólkinni ofan í pottinn og látið sjóða í um það bil 20 mínútur.
Maukið blönduna með töfrasprota og smakkið til með saltinu, piparnum og safa úr 1 límónu.
Bætið svo kóríander út í sósuna í lokin.